Kaupapa: Youth

He whakamanawa rangatahi Māori kia tū tangata

He momo marae ātea hōu ngā pae pāpori o te ipurangi pērā i te Pukamata, e ai ki te māngai Māori i ngā take pae pāpori, ki a Tākuta Acushla Dee Sciascia. Ko tētahi e whai hua i ēnei mahi, ko Hana Tapiata, he uri Māori i Te Urupū, ā e hia manomano Māori ka toro atu ki a ia i tana pae pāpori ki te whakawhitiwhiti kōrero i ngā take pēnei i te tuakiri.

“Tokomaha Ngāi Māori he whakamā kē i tō rātau Māoritanga, ko tōku tino hiahia he whakamana i a rātau, ā, i a tātau katoa.”

Nā Hana Tapiata te hinonga Te Urupū Media i whao, he umanga pāpāho papori ki Ahitereria e tautoko ana i te iwi Māori ki reira, otirā puta noa i te ao ki te whakatairanga pakihi, ki te whakawhanake tuakiri anō hoki.

“Ko tāku he tautoko i ngā pakihi kia whakapuaki pai ake i o rātau whakaaro i me o rātau hiahia ki o rātau apataki,” te kōrero a Hana. 

Āpiti atu kei te horapa haere ngā whitiata a Hana Tapiata ki pukamata, arā ko tāna mahi he tuku korero ki ngā momo pae tukutuku hei whakahihiko i te Māori.

“Ehara i te mea me whai rātau i tēnei huarahi, tokomaha kāre i te pai ki a rātau ngā whitiata te kōrero rānei, ko tōku akiaki kia whai ngā rangatahi, te katoa, i tō rātau e tino ngākaunui ana,” te kī a Tapiata.

“Ka hiahia ratau te hono atu ki o rātau marae kia mōhio atu ki a rātau ko wai o rātau tupuna, ko wai o rātau whanaunga, ka hono mā te pukamata… He ara ka taea e rātau te whakahōhonu i ō rātau mōhiotanga e pā ana ki te tuakiri,” te kī a Tākuta Sciascia.

Hei tāna he taputapu pai tēnei kia hono atu, engari ia te tikanga, he kanohi kitea.

“Pai te pae tukutuku, pai te torotoro haere i te pukamata engari kāre he kaupapa i tua i te noho tahi kōrua ko tō kaumātua.”

Hei tā Tākuta Sciascia, mā te whakamahi tika i ngā taputapu nei e puta ai ngā hua ki ngā iwi.