Kaupapa: Environment

He ture-ā-rohe nā Te Arawa hei tieki taonga ika

Te Kuru o te Marama Dewes

Ko te tiaki i ngā ika wai Māori me ngā mahinga hao ika a Te Arawa te aronga o ētahi ture ā-rohe e tonohia ana hei whakaruruhau i ngā roto tekau mā toru o Rotorua. Hei tā Toby Curtis, Heamana o Te Poari Kaitiaki o Te Arawa a Toby Curtis, kei te tata te korehāhā o ētahi momo ika tūturu o te rohe, ā, me whakaora ake, ka tika. 

"Kia kai hoki rā rātau i wēnei tū kai, ana kia toe, kia maha hoki rā wēnei taonga mō ngā whakatipuranga kei te whai ake, koinā te tino moemoeā a Te Arawa," te kī a Curtis.

Hei tāna anō, i a ia e tamariki ana he maha ngā momo ika pēnei i ngā roto o te rohe Heoi, kua mimiti haere ngā taonga ika i ngā tau.

"Kāore e tino nui tino maha tēnā momo ika, tūmomo taonga, ana ka rāhuitia."

Ko te kōaro, te koura, te tuna, te kākahi, te inanga me te morihana anō hoki ka rāhuitia i raro i ēnei ture. Ka mutu, mā ngā uri o Te Arawa anake ngā taonga ika nei e hopu, arā, hei whakatutuki i ngā kaupapa me tikanga Māori anake.

Ko tā Tā Toby Curtis, "I roto i a mātau kōrero pā ana ki te Tiriti kei a mātau te mana hei hanga he ture mō Te Arawa ana mō te motu katoa."

Maru ana ngā ture ā-rohe nei i ngā roto pēnei i a Rotorua, Tarawera, Rotoiti, Rotomā anō hoki, engari ngā kōawaawa ka wātea tonu ai kia hīa e te tangata.

"Kia mōhio, kia kaha wā tātau tamariki mokopuna ki te whai i tēnei āhuatanga i waihotia wā tātau kuia koroua," te kī a Curtis.

Kei te akiaki Te Poari Kaitiaki o Te Arawa i te katoa kia whakapā atu ki a rātau mehemea ka hopu tūpono noa nei wēnei ika, otirā, kia whakahoki atu ki te wai.