Ngā kaupapa: Entertainment, Health

He konohete mō Cordae

updated

Ko te mate toto ma he mate weriweri, heoi mēna e toru tau noa te pakeke, ko te mutunga kē mai o te weriweri.

He whā tau te roa o te mahere whakaora i a Cordae Marsh e pākia ana e te mate nei. Kei tōna tau tuatahi a Cordae i tana ara whakaora, ā, kua pokea katoatia rātou ko tōna whānau e ngā taumahatanga o te mahere nei, nā whai anō kua whakatūria e tōna pāpā tētahi konohete kohi pūtea ka tahi, whakatairanga ake i te mate nei ka rua.

Tērā tētahi tamaiti manawarū, manawa tītī, ko Cordae Marsh, heoi kotahi tau ki muri tātaritia ia mō te mate toto maa, mea rawa ake pōkīkī katoa te ao o te pepe nei me tōna whānau.

Kua tekau marama a Cordae rāua ko tōna māmā e whai ana i te mahere whakaora i a ia, mahue mai ana te pāpā ki te kāinga, tiaki ai i o Cordae tuakana, teina hoki. 

Ka utua te taha ki ngā rongoā me tō Cordae noho ki rō hohipera, engari anō te taha ki ngā utu penehīni, he nohoanga mō māmā ki te taha i a ia, me te mea nei neke atu i te toru tau e toe ana ki te mahere whakaora i a Cordae, nā whai anō hei te Rāhoroi e haere mai ana, ka tū tētahi konohete hei kohi pūtea.

Ka kotahi atu ngā rōpū me ngā kaiwaiata, pēnei i a Three Houses Down, Che Fu, Chad Chambers, NRG Rising, Native Sons ki Paeroa, te kāinga o Cordae me tōna whānau, ki te tautoko i te kaupapa, ā, ko Te Hamua Nikora, Aroha Hathaway rātou ko Mabel Wharekawa-Burt ngā kaihautū.