Kaupapa: Health

He hopuni ohotata mō te rawakore ki Rotorua

Te Kuru o te Marama Dewes

He whare āhuru mō te rawakore ka whakatūwheratia ki Rotorua a tērā wiki. Ka whakangāwari a Sanctuary Manaakitanga i ngā taumaha kei ngā kāinga kore i ngā mārama o te Hōtoke.

Ka tū ki te pokapū o Rotorua, heoi ka noho muna te wāhi i tēnei wā. He whā ngā marama ka noho tūwhera ai te hopuni. He hīrere, he mihīni horoi kākāhu. Kāre e whakaaetia te momi, te waipiro, ngā pūroi, te patu tangata ā-tinana, ā-kupu rānei. Ka mutu, ki te whati tētahi i ngā ture nei kei panaia ia ki waho, ā, e kore pea te tatau e tūwhera anō ki a ia.

Nō te Mane kua taha ake nei, neke atu i te kotahi rau rua tekau tāngata i whakeke atu ki te Te Kaunihera o Rotorua, he karanga kia whakatūria tētahi whare āhuru. I kōrero ahau ki a Tiny Deane, koia te kaiwhakahaere o te whare āhuru hou nei, hei tāna he ono tekau mā waru ngā kāenga kore ki Rotorua i tēnei wā. Ko tāna anō, tokomaha ngā rōpū i mahi tahi ki te kaunihera arā, he taratī-ā-iwi, he whare hāhi, he pakihi anō hoki, kua kohi moni kia tū ai te hopuni nei.

Hei ngā ata tūwhera ai te ratonga tautoko o Visions of a Helping Hand hei whāngai parakuihi, ā, he hāpai anō i ngā rawakore ki ngā moho ratonga tautoko. 

Ko te wawata ia a Deane ka whakatūria tētahi momo hopuni pūmau a tōna wā, ki reira whakapakari i ngā kāenga kore, arā ngā waranga pūroi me te hauora, ka mutu kia whai whare, kia whai mahi ai rātau. Hei tāna, koira te huarahi hei whakatika i ngā āhuatanga kāenga kore.