E whakanui ana te whakataetae waiata a E Tū Whānau i te tika

Mā te waiata e pā ki te hinengaro me te ngākau o te tangata, e whakaohooho i te iwi. Koia te whakapae a E Tū Whānau i whakatū whakataetae waiata mō ngā iwi o te motu.

Hei tā Paenoa Pahuru-Huriwai (Ngāti Porou), “Tuatahi, kua kuraina au ki tenei kura, kua wehe au i te kaenga mo te ahua rua tau. Kua ahua noho mokemoke au mo te wā kāenga. Ko tēnei waiata mōku ki te patua i tōku mokemoketanga mō te wā kāenga.”

E tūwhera ana te whakataetae ki ngā whakatapoko mai ngā reo irirangi Māori, me te aha, ka pāpāohotia te waiata o te toa ki ngā reo irirangi Māori o te motu.

E ai ki a Brent Mio, kaikōrero mō E Tū Whānau, “Ko te mahi a ngā reo irirangi Māori o te motu he waka o tā mātau kaupapa ki te hoatu ki ngā tāngata katoa o te motu.”

Ko ngā kai-whakahaere o te whakataetae waiata nā E Tū Whānau e karanga ana ki ngā whānau kia titoa mai he waiata e akiaki ana i te tika, e whakatinana ana i ngā uara o ngā tikanga Māori.

Hei tā Erana Keelan-Reedy, Tumu o Radio Ngāti Porou, “He huratahi tēnei ka tarea te tuku atu i ērā waiata kia whakapāohotia kia titia ki te whatumanawa ki te hinengaro o te tangata kia tīni ngā whakaaro o te whānau kia whai hua mai ngā whānau me ngā uri whakatipu.”

Whā tekau mā tahi ngā whakaurunga i tēnei wā, ā, kei te kitea te ngākau hīkaka a te rangatahi ki te tito waiata hei whakatenatena, hei whakahihiko i te iwi.

Hei tā Paenoa Pahuru-Huriwai, “He kaingākau tōku ki te waiata.”

Hei te rangi nei aukati ana ngā tono. Kei te whārangi pukamata o E Tū Whānau ngā waiata, hei te rima o Hune pau te wā ki te tuku pōti, ā, ka tarea te tuku pōti ia rā tae noa ki taua wā.