Kaupapa: Koroneihana

E maumahara ana te Pīhopa Mātāmua a Wiremu Brown Turei ki te Koroneihana

Ka whakamaharatia ngā rangatira kua riro atu i te tau kua hori pērā i Te Pīhopa Mātāmua o Te Hāhi Mihingare a Wiremu Brown Turei i te rā tuarua o te Koroneihana tuangāhuru mā tahi o Kīngi Tuheitia. I reira whakarauika atu ngā iwi o te motu ki ngā whakatairanga.

Hei tā Rikirangi Gage (Te Whānau a Apanui, Ngāti Porou), “E noho tonu ia hei pou, he hēpara nā Te Atua, ka mahi tā Te Atua i wāna mahi me te mōhio anō taha wairua e haere ana i te taha o te kaupapa o Te Kīngitanga.

E ai ki a Tukuroirangi Morgan, “Nāna i tuku ngā karakia i te kawenga atu o tō tātou Arikinui ki runga i te kare o te wai, ki runga o Waikato, heke atu ki tō tātou maunga tapu. Nāna ngā karakia i te tuangāhuru o te Koroneihana o Te Kīngi.”

E tū ana ngētehi o ngā kapa haka toa o te motu ki te whakatairanga i te karanga o te rā, whērā i te kapa i Tāmaki Makaurau e whakahōnore ana i Te Pīhopa Mātāmua o Te Hāhi Mihingare i a Wiremu Brown Turei

E mea ana a Don Tamihere, te Pihopa o Te Tairāwhiti, “Kua waiho e ia ōna tauira ki a mātou te whakapono, te ngāwari, te māhorahora, te ahureinga o te aroha, aua mea katoa. Nō reira, ko tātou mahi i tēnei wā kia whakapono tonu ki te Atua. Kia whai muri ki a ia te tauira kua waiho nei e Te Ākipīhopa.”

I whakamahara hoki i ngētehi atu matanga i ngā mahi ā-toi whērā i a Mita Mohi nō Te Arawa.

E kī ana a Te Ururoa Flavell, “Te toa o te whare tū tauā o Ngāti Rangiwewehi otirā o te whare tū tauā o te motu tapu a tini rau ko Mita tērā, tō mātou tangata i mate i te tau kua hipa ake, kei te mamae tonu te ngākau mōna kua riro, ka mutu ki ngā mate huhua kua pā mai ki a Te Arawa whānui.”

Apōpō ka huri te titiro ki ngā take tōrangapū, me te pōwhiri i ngā kaitōrangapū ki Tūrangawaewae, whērā i te Minita Whakatau i ngā take kerēme i a Chris Finlayson.