E hiamo ana ngā toihau ahurei o tāwahi i te kounga o ngā kapa haka

Ko ngā kapahaka toa e rua o Te Matatini ki Rotorua ka haere hei kanohi Māori mō Aotearoa ki Kotirangi hei te marama o Hereturikōkā, ki reira whai wāhi atu ai ki te ahurei ngāhau tauā nunui rawa, te Royal Edinburgh Military Tattoo. I pōhiritia ētahi o te komiti whakahaere i te ahurei kia haere ki te whakataetae kapahaka ā-rohe o Mātaatua i te Rāhoroi ki muri nei, kia kite ā-kanohi atu i te tū tauā a te Māori ki te ngāhau.

Ā, i whakakao mai te iti me te rahi o Mātaatua waka ki te mātaki i ō rātou kapa haka e tū ana ki ngā whakataetae ā-rohe.

Hēoi anō rā, ko ētahi tonu i tae ā-kanohi atu, he waewae tapu ki Aotearoa nei, ā, nō whenua kē.

E ai ki a William Burdett-Coutts, o te komiti whakahere o te ahurei Assembly mō te taiopenga nei “kei te tino miharo ahau. He ātaahua te mātaki atu me te mōhio nei kua ora ahakoa ngā tūkinotanga o neherā.”

I karangahia mai kia tae mārika mai ngā mana nui o Kotirangi i te mea e rua ngā rōpū haka e haere atu ana ki tō rātou ahurei nui rawa, arā, te Royal Edinburgh Military Tattoo i tēnei tau.

E ai ki te toihau o Te Matatini, ki a Herewini Parata “ko aua kapa haka e rua i wikitōria, a Te Waka Huia, i tuarua a Te Whānau a Apanui i Te Matatini ki roto o Te Arawa. Nāreira, i whakatau Te Matatini mō ngā kaihaka te haere ki roto o Edinburgh ka puta mai i aua kapa haka e rua.”

He rua tekau mā rima ngā kaihakahaka a ia kapa e tukuna ana kia haere hei kanohi mō tātou te Māori.

Ko te hiahia nui, kia whakaatu i te ahurea Māori ki ngā tāngata o wāhi kē.

Hei tā William anō “I rongonui te haka i ngā kēmu whutupōro, ā, e hikaka katoa ana mātou te mātaki. Engari kāre rawa i te mōhio ki tōna hītori me tōna orokohanga mai. Nōreira he pai tonu kia rāngona ki tētahi huihuinga nui.”

Ka tapirihia a Laura McKenzie-Stuart o Creative Scotland “kua roa e noho pūmau ana ngā hononga ki waenga i a Kotirana me Aotearoa. Ko tā mātou he whakaora anō i aua hononga.”

Kāti, hei te marama o Hereturikōkā whakahaeretia ai te ahurei nui nei, me te mōhio anō hoki, he kanohi Māori e kitea rawatia ana.