Kaupapa: Kapa Haka

Backstage with Te Wharekura o Mauao - Te Mana Kuratahi

Wepiha Te Kanawa

Me pēhea rā e whakarite ai kia eke ki te taumata o te whakataetae kapahaka ā-motu o Te Mana Kuratahi?

Ko Te Wharekura o Mauao tētahi kua tae atu, ā, ko tā mātou karere ko Wepiha Te Kanawa i whai wāhi ki te whai haere i a rātou i mua i te ekenga ki te mura o te ahi.

Ko te kakara o te piupiu me te rongo o te waewae pao he momo e mohio ana e ngā kapa whā tekau mā whitu ka eke ki te papa whakatūwaewae. Engari he wheako hou tēnei mō te nuinga o ngā tauira o Te Wharekura o Mauao.

Hei tā Aukaha Dickson, “Kua āhua tau te wairua, āhua hīkaka, kua tau mai ngā pūrerehua, i te wiriwiri ngā pona engari me mahia te mahi. Kia ora ai ngā a Hinearehia rāua ko Tānerore.”

He hokinga mahara tā rātou waiata tira ki tō rātou hoa, a Kereopa Merritt-McDonald me te kuia o te kura a Iria Te Whiu.

Hei tā Stu Mcdonald, “Katahi anō kua hinga atu taku tama ki tera mate taniwha te mate pukupuku, toru marama pea ki muri i mate taku tama no reira i tono mai te kura ki ahau ki a mātou ko toku whanau te tito tētahi waiata mōna.”

Ko tā ngā kapa ināianei he whakaatu ki ngā kaiwhakawā i a rātou kaha, i mua ake i tā rātou whakatau whakamutunga apōpō.