Te whāinga rongopai o te hapori o Moerewa

  • Te Tai Tokerau

I hui tahi te hapori o Moerewa me ngā kēnge ki te rapu oranga mō ngā ahuatanga kikino i pā ki taua tāone i ngā rā tata nei.

Ko tā tētahi o ngā mema o taua hapori ko Peeni Henare ko te hiahia ko te noho ngātahi ki ngā kēnge nā te mea ko te nuinga o ngā mema he whanau, inā ko te hiahia ko te whakatau i ngā raru kia tau ai te puehu kimi oranga kia taea e te katoa te noho ora ki Moerewa.

Kīhai te hunga papāho i āhei ki roto i te hui engari i rongo ake te riri o ngā reo, i te hui.

Ko tā Herby Kelly tētahi atu o ngā mema o te hapori ko te tikanga me huihui me korero rātou katoa i enei ahuatanga e hoa te titiro, ko tāna ano kei te mataku ngā tamariki me ngā whanau ki te puta atu i ā rātou whare. Ko te ahuatanga tino kino o tera ko tāna ko te nuinga o ēra e whawhai ana he whanau.

Ko ta Henare ano i kaha tutū te puehu i roto i te hui i runga i te whai o te hapori ki te whakatau atu i ā rātou nawe i te mataku hoki ki ngā mema kēnge i tau atu ki te hui.

Tokowhā ngā tāngata ka tu ki te koti a ngā rā e tu mai nei i muri i te pakunga o ngā pū ki ngā tiriti o Moerewa me te weronga o tētahi ki te oka. Engari mai i tenei hui kua tohua he komiti whāiti hei kōkiri i ngā hiahia o te hapori kia tutuki rā ano.

Ko tā Kelly he hiahia kotahi tā te tāone ko te whakamutua aua ahuatanga katoa, kia whakakore ai i te mataku a ngā tamariki me ngā whanau e noho āwangawanga ana ki roto i ā rātou whare.

Kairīpoata: Dean Nathan.