Te panui tuatahi o te pire Mokomoko

  • Waikato/Te Waiariki

He ahunga tenei ki te whakāetanga i whakatauria e te Kāwanatanga me āna uri i tera tau, kia riro hoki mā te ture e wetekia ai nga hara i whakapāetia mo Mokomoko taronatia hētia e te Karauna i te tau tahi mano, waru rau, ono tekau ma ono.

“Tangohia te taura i taku kaki, kia waiata au i taku waiata” koinei nga kupu ōhaki a te tipuna o Whakatōhea a Mokokmoko mo te kōhurutanga o Reverend Carl Volkner.

I te tau kotahi mano waru rau e ono tekau ma rima i tupono kitea a Volkner e tarona iho ana i tetahi rākau i Opotiki. Ko te hurikiko, na te hāhi paimarire a ia i kohuru.

Ki tā etahi o te hapori, ko Volkner he kaitutei mo te Kāwana Grey ā i haere nga hōia ki taua rohe ki te whaiwhai haere i nga kaihara. E ai ki nga uri whakaheke o Mokomoko, i kāhakitia etahi whanau i whakamatea i pawheratia hoki. Ko tā tetahi o aua uri whakaheke “ kei te taumaha tonu, kare tana ingoa i whakaponotia”.

I te tau kotahi mano iwa rau iwa tekau ma rua, i whakapāha te Kawanatanga ki te whanau Mokomoko, engari e kore tera e whakatika i te katoa o nga hē me te pāmamae o te whanau. Ko tā te kai-ārahi tuarua o te Paati Maori a Pita Sharples, “ nā tera ahuatanga kua kaha whakaparahakotia te whanaungatanga ki waenga i te iwi Maori me te Karauna”.

Inaianei kua timata te whakatika i era hara, a i whakāe te whare miere ki  te panuitanga tuatahi o te pire Mokomoko. Ka haere tonu te pire ki te komiti whirirwhiri i nga take Maori ko te tumanako ka haere tonu ki te pānuitanga tuarua.