Kaupapa: Crime

Kua hui tahi te hapori o Kāwhia

  • Waikato/Te Waiariki

Kī pai ana te Whare Hapori o Kāwhia i te tini o te haukainga, e anga whakamua ana whai muri i te tūkinotanga i whakapaea ki te pirihimana takitahi o te tāone ki a Kātipa Perry Griffin.

Ko tā te Koromatua o Ōtorohanga a Dale Williams, he wāhi pai te hui mō te hapori kia taea e rātou te ea i a rātou nawe, a rātou āwangawanga hoki mō te tāone me ngā rā inangeto nei kua whakararu i te tāone.

He 19 te pakeke o Jackie Maikuku kua mauheretia rāua ko tōna pāpā a Jack Maikuku mō te tūkino i a Griffin, a inanahi nei rā i whakawāteahia e ngā pirirhimana tētahi tangata he 21 tōna pakeke mō tēnei āhuatanga.

E mea ana ngā rīpoata i tūkinotia a Griffin, e tētahi tira tāne tokorima, ko ētahi o ngā kōrero motuhake e whakapae ana e mataku ana ētahi o te hapori ki te whānau Maikuku. Heoi anō, e rerekē te whakahoki a ētahi mema o te hapori, me te whānau Maikuku anō hoki.

Ko te whakapae a Jasmine Teei i reira i a i te wā o tēnei tūkino, ko tāna kāore ia i kite i te riri o te tangata a Jackie Maikuku tae noa ki te huringa o te āpiha ki te whakaputa i te hau pepa, me te pūhia i a ia mā te pū hiko.

I tau atu te māmā o Jackie Maikuku, a Lisa Panapa ki te hui, koia hoki i puta ake ki te raru i puta i te 11 o Hanuere me te tuku kauhau, whakapāha hoki ki te wā kāinga o Kāwhia.

Ahakoa kua tīmata te mahi o te hapori ki te whakatau i ngā raru kua pupū ake ki waenganui i a rātou, kei mua i te Kōti te kēhi mō te tūkinotanga o Kātipa Perry Griffin.

Kairīpoata: Harata Brown.