Ko Titewhai te pae-ārahi mo Key i Waitangi?

  • Te Tai Tokerau

Kua rongonui a Titewhai Harawira ki ngā whakanuitanga i Waitangi mōna e hautū nei i ngā Pirimia o te wā ki waenga porotū i Te Tii Marae.

Ko tā Kingi Taurua he mema o te poari o Te Tii, ko tā rātou hiahia kia hoatu ki ngā kuia kua roa nei e whakapaipai ana i te marae, kua roa e awhi ana i te kaupapa ki te ārahi i ngā manuhiri rongonui ka tau atu ki Waitangi i a tau.

I tēnei tau kua īnoia te Māreikura o te whānau Harawira e te Tarahiti o Te Tii kia heke iho ia i taua tūranga. Ko tā Taurua ko te rā o Waitangi anake te rā ka kitea e te marea i a Titewhai Harawira i reira, ko tāna i ngā wā taumaha mo te Marae me ēra atu kaupapa katoa e kore e kitea te kuia ki reira e tautoko ana i te kaupapa.

Ko te tangata kei waenga i ngā tautohe o te wā ko tā John Key “ Kīhai au i te whakaputa kōrero mō ngā kaupapa Māori nei, engari kāre he raru ki ahau ka whai haere au i te wahine ka whakaritea e rātou”.

Heoi i te whakapātanga atu ki Harawira, he kore paku hiahia ōna ki te whakahoki i ngā whakapae. Ko tāna, “kāre au i te paku hiahia ki te whakahoki kōrero kia Kingi Taurua, kāre au i te whakaheke i ahau anō ki tōna taumata”.

I tīmata mai ngā mahi hautū Pirimia a Titewhai i te tau 1999, me te ohorere ā ētahi i te puritanga ringa ōna a te Pirimia o te wā, te kai-ārahi o Nāhinara a Jenny Shipley. Mai i taua wā kua hautū i a i a Helen Clark me te kōhete hoki atu i a ia, arā me te Pirimia o te wā arā a John Key.

Ko tā Harawira e rima tau ki muri i puta te whakatuma a Kingi Taurua ki a ia ka rāhui i a ia i te Marae o Te Tīi ka karawhiua hoki e ia i a Harawira i te piriti o Waitangi.

Kotahi tonu te kaupapa i hiahiatia e ia kia whakapuakitia, ā ko te kaupapa tēna ka kawea e ia ki Waitangi i tēnei wiki.

Ko tāna ko te whai tuatahi ko te whakapuaki ki te marea tōna hiahia ki te whakakore i te mahi tūkino, whakamate tamariki ki waenga i ngā whānau Māori o te motu, ko tāna kāre he take o ngā whakataunga kerēme mēna kei te matemate haere ngā whakatupuranga Māori i te mahi tūkino.

Ahakoa e noho tōtara wāhi rua ana te tokorua mo te take kaihāutu kei te kotahi te whakaaro mo te take rongomau.

Ko tā Taurua kāre he raru mo te porotēhi, heoi ko tāna kia kawea ake taua karanga mā runga i ngā tikanga o te Marae kia kore ai e whakaparahako i tētahi atu. Ko tāna ko te mahi o te hau kainga ko te whakatau i ngā manuhiri .

Kairīpoata: Amomai Pihama.