Kaupapa: Welfare

Ka hui tahi te Minita Whakahiato Ora rāua ko Sam Kuha

updated
  • Te Tai Tokerau

I whakamutua e ia tona nohonga kore kai i tera wiki na te whiwhinga o tetahi reta mai te Minita e whakāe ana ki tana tono kia huitahi rāua ki te korero i ōna nawe. Na reira kahore i tu atu mo Sam ki te kai i tona kai tuatahi ki te taha o te mema paremata mō Te Taitokerau a Hone Harawira.

I tōna kai tuatahi i kaha rongo te marea i tana ngakau koa i te mutunga o tana noho puku, inā ko te pēkana te tino kai mōna heoi ko tōna whakatau ehara i a i te kai i te hinu. i tōna nohonga kore kai mō ngā rā toru tekau, tokomaha ngā tāngata i āta whai haere i āna nei mahi me te kaha tautoko mōna. Ko tētahi o aua kaitautoko ko te rata no Te Taitokerau a Lance O Sullivan i tae a tinana atu ki te kainga o Kuha ki te tirotiro ki tōna ahua. Ko tā Kuha “ kei te harikoa au Ehara tenei kaupapa i te mahi whiua i te he, he kaupapa kē hei āta whakatika i ngā raru nui kei te pā ki ngā tamariki pohara”

I tōna nohonga tahi ki te kai me Sam Kuha ko tā Hone Harawira i te tino harikoa ia ki te kite i tōna whanaunga e kai ana ko tā Harawira ano “na te whakāetanga o te Minita kia haere mai ki Kaikohe noho tahi korero tahi ki a ia mo ngā take nui e pā ana ki te pani me te rawa kore, he mea nui tera, he wikitoria mo Sam”.

Ki roto I tana reta kia Sam, he tono na te Minita a Paula Bennet kia whakamutua e ia tana noho puku kātahi ia ka whakāe kia hui rāua kanohi ki te kanohi ki te korero i nga nawe e pā ana ki nga whakahaere o ngā tono a te hunga whiwhi penihana.

Ko tā Hone Harawira i te noho mataku te motu, Māori mai Pākeha mai ki te noho puku o te tangata nei, me te māharahara a te nuinga kei mate kē ia nā te roa o tana noho kore kai.

I pupū ake tenei ahuatanga i te kore whakāetanga o te tari Hiranga Tangata ki tētahi tono pūtea kai na Kuha, nā tā rātou mahi i hoki i a ki te tari o Kaikohe me tana hama taumaha ki te tukituki i nga matapihi o te tari. Ko tā Kuha ano nō te rironga o tana waewae kua piki ake nga raru mōna me tōna whai awhina mai te kāwanatanga, ko tana i te whakakorenga o tana tono i whakaparahako katoatia e nga kaimahi o taua tari i a ia.

Kāre ano kia tau ai te rā huihuinga ki wāenga i a Kuha me te Minita, heoi ko te whakatau a Kuha ki te Minita ka kaha tiaki ka kaha manaaki i a ia i tōna tāenga atu ki Kaikohe, koira anake te huarahi hei tāna ka tāea te whakatika i nga mahi hē kei te kitea e ia i roto i te tari Hiranga Tangata.