He ngaronga nui mō te ao Māori

  • Te Tai Tokerau
  • Tāmaki Makaurau
  • Waikato/Te Waiariki
  • Te Tai Hauāuru
  • Te Tai Rāwhiti
  • Te Whanganui-ā-Tara
  • Te Waipounamu

Ko tona tuakana tera i arahi i te karakia nehu mo Rau Kapa. Ko te mātāmua o te whānau e whakarau peka ana ngā mahara ki tana tungane nana nei i poipoi. Ko tā Ihapera Edmonds te tuahine o Rau Kapa  “E rua pea marama ki muri e korero ana mātou te whānau ka mea mai ki au i mua ia Tarawau ko hau tou pepi ne? Katahi au ka mea atu ae, ka mea mai a Tarawau ko hau kee i mua atu i a ia ko era ngā tūmomo korero i tera wā”.

Oho pai ana ngā whanaunga o te wā kainga i te mea no ngā rā tata nei ano i te whare karakia o Aperahama a Rau me tona whanau ki te whakahou i ngā oati o te mārenatanga ki tona hoa rangatira. Ko tā Reverend Queenie Matene “ Ka ngau te mamae i te rongonga ka kore au e whakapono ee ko koe marika tenei ka panuingia mai i runga i Te Kāea ka tangi, ka tangi ka tangi tino pātata hoki māua”.

He oranga wairua mō te whanau pani ko ngā korero maha kua whārikihia ki runga i tō ratou uri.

Koia tetahi o ngā rongonui i para i te huarahi kia puawai mai te aō papāho Māori i tenei wā tae noa ki tona aru i ngā tapuwae o tona tupuna a Matiu Kapa i kauhautia te rongopai ki tenei o ngā peka o Ngāpuhi. Ko tā te heamana o Te Rūnanga o Ngāpuhi a Sonny Tau “ te hitori te hohonu i te mea a Te Kapa no Te Aupouri tera tangata i tae mai ki konei kauwhau ai na ko tenei manga o ratou i noho ki konei. Tika tenei wāhi e hoa ngā poropiti o te ao o Ngāpuhi i huihui ki Te Kotahitanga nei koia ka whakatau te whare hei maumahara kia ratou. Ō tātou rangatira i mua atu i te hainatanga o te Tiriti o Waitangi ka noho tahi ai ratou ki tenei”.

He tangata i tū nui ki te aō, a i tenei wā kua ngaro i te tirohanga kanohi, kua mahue hoki i āna tamariki tokorua, āna mokopuna tokotoru me tōna hoa rangatira e tu mokemoke ana mōna i tenei wā a Gail Kapa .

E kore nga tākoha o tenei tangata ki te ao Māori e warewaretia .