He ika parāoa kua pae ki tātahi ki te ākau o Paraparaumu.

  • Te Whanganui-ā-Tara

Ohorere katoa ana ngā kainoho o te akau o Paraparaumu inanahi nei, nō tō rātou ohonga ake i te ata, he ika parāoa i kitea kua pae ki tātahi.

I hui tahi ngā māngai o ngā iwi e karapoti ana i te ākau me te Papa Atawhai ki te whakatau ake, me aha te tūpāpaku.  I takina ai ngā karakia i ngā haora moata inanahi nei, kia hikina ai te tapu, kia tukuna hoki te wairua o te parāoa nei ki te pō.  E ai ki ngā tohunga o te moana, he tane pakeke te parāoa nei, he tata ki te 20 mita te tāroa, ā kei te takiwā o te 40,000kg tōna inenga taumaha.

Hei tā Hawea Tomoana, “He mea ohorere te kite i te wāhi i pae ki tātahi tēnei parāoa, tērā pea e mōhio ana koe, he mana whenua tā tēnā iwi, tā tēnā iwi hoki.”

Ko te wāhi e noho ai te parāoa kei waenganui pū i te tauwhā o ngā iwi o Te Ātiawa me Ngāti Toarangatira. Heoi e kama ana ngā iwi ehara tēnei i te wā mō te tautohetohe.  Ehara tēnei i te tuatahitanga mō te ākau o Paraparaumu.  I te tau 2011 i te marama o Hakihea, i mate tētahi atu parāoa.  Mō te Papa Atawhai, ko wā rātou mahi he whakawātea i te parāoa nei.

E ai ki a Brent Tandy nō Te Papa Atawhai, “ko te mahi tuatahi kia tangohia te parāoa nei mai i te onepū na te mea e tanu ana ia.”

Ko ngā iwi ka takatakahi i tēnei o ngā whenua ko Ngāti Raukawa, Ngāti Toarangatira me Te Ātiawa.  E pari ana te tai, ā ko te tikanga kua tangohia tōna kauae i te ahiahi.

Hei tā tētahi kaumātua a Te Raakauoteora Te Maipi, "he hiahia nō te iwi ki te nehu i runga i ngā āhuatanga a Kui mā, a Koro mā."

Ka waiho mā ngā tohunga o Te Papa Atawhai me ngā tohunga o te iwi e āta tiaki.  Tōna tikanga i te pō rā kua tukuna ngā karakia ki te wetewete i te kauae o te parāoa nei.  Ka tākohangia ki te iwi.

Kairīpoata: Wepiha Te Kanawa