E hamahama ana te Pirimia i ngā kaiporotēhi

  • Te Tai Tokerau

Nā te Pirimia te karakia tuatahi i taki, me tāna whakawhētai ki ngā iwi e rua i whakatinana mai i tēnei tāonga o tātou.

Karekau te Pirimia i takaroatia i te ata nei, ko te take pea nā te takaroatanga kē o tāna kaikawe o nanahi. Tīmata ana ngā karakia ka tae mai a Titewhai Harawira ā i te whare e noho matāra ana i tau kē te rangimārie.

I mihia ngā mate i whai mahara hoki ki ngā hōia kei tāwahi, ko te manako nui kia ngātahi te motu whānui. Tēra tēra, he paku wero wā ētahi, i a Maanu Paul e kōrero ana mo te mana ki ngā wai.

Heoi i te kauhau ā te Pirimia mō Waitangi he kōrero rerekē tāna waihoki i kite i ta John Key hōhā. Ko tāna “e mōhio pū ana te hunga e whai ana i ngā rama o te hunga pāpāho ka kaha aro atu te maha noa kia rātou mēna ka whakararu ai rātou i ngā mahi, ki ēra e ngana ana ki te whakatau ki te kōrero tika hoki”

Heoi ko tā Sonny Tau te heamana o Te Rūnanga o Ngāpuhi e kore te tangata e taea te anga whakamua mēna kei te mamae tonu rātou.

Kāti mena ko te aroha te whai a te Pirimia i reira a Pita Sharples ki te mirimiri tuara, me tana mihi atu ki te Pirimia mo tōna kaha ki te hono atu ki te mahi tahi me te Pāti Māori.

Engari he miringa whakarikarika kē i ētahi, ko tā te tarahiti o Te Tii ko Kingi Taurua inā he pōti mo te Pāti Māori he pōti mō Nahinara nā reira ko tāna tono ki te Pāti Māori kia āta tiro atu te pāti kia rātou anō ki te whakaritea he aha rā tā rātou tino whāinga.

Kō te ahua ia he aroaro nui e haere ake nei.

Kairīpoata: Maiki Sherman.