Ngā kaupapa: Treaty Settlements, Water

E ahu atu ana Ngāti Ruapani ki te Kōti Matua mō te mana wai Māori

  • Waikato/Te Waiariki

Kei te paunga o tēnei marama tau ai mēnā ka rongo hoki Te Kōti Matua i te tono a Ngāti Ruapani ki Waikaremoana mō ōna mana wai Māori.

Ka whiriwhirihia tēnei take i roto i te whakawātanga a ngā kaitono Māori e whakahē ana i te kaupapa hoko rawa a te Kāwanatanga, kei riro ngā mana whai pānga Māori ā muri atu.

Ahakoa ngā whakahē a Te Kaunihera Māori i te hiahia a Ruapani kia tū wawao, kua tono atu te kōti ki te iwi nei kia tuhi tono atu i mua i te whakawātanga, ā, tāria te wā ka mōhio mēnā ka hiahia rongo hoki i ētahi kōrero āwhina ā-waha.

Nō Tūhoe, Kahungunu me Ruapani te mana ki ngā papa roto i te rohe o Waikaremoana, ko ōna wai ka whāngai i ngā puni huri hiko a Genesis Energy i taua rohe.

Ko tā Ruapani e mataku nei, ā tōna wā pea ka rite hoki a Genesis Energy ki a Mighty River Power, he tata ki te haurua o ōna hea e hiahiatia ana e te Kāwanatanga, te hoko atu.

E tatari ana a Ruapani i te putanga o tētahi rīpoata a Te Taraipiunara o Waitangi mō ōna kerēme.

Kairīpoata: Piripi Taylor.