Mā te Pāti Māori anō e whakatau i te kāwanatanga?

Ki te kore te rōpū Reipa e aro ki te kaupapa Whānau Ora, ka kore hoki te Pāti Māori e aro ki a rātou. Koirā te mānuka kua whakatakotoria e te māngai mō te Waiariki, e Te Ururoa Flavell, whai muri mai i ētahi tatauranga tōrangapū hōu e tohu ana, ki te pōti tātou ināianei, ka riro i te Pāti Māori te mana whakatau i te kāwanatanga. 

Te āhua nei kua ekea ngā tairo a Kupe e David Shearer.  E rua ngā tatauranga tōrangapū i puta i ngā rangi okioki e whakaatu ana kei te kake ake ngā taunaki mōna.

E tohu ana ngā tatauranga a Colmar Brunton, ka taea e Reipa rātou ko ngā Kākāriki te whakahaere i te kāwanatanga ko rātau anake.  Whakawhiti atu ki ngā tatau a Reid Research, kāre he wehenga i waenga i te paehau mauī, i te paehau matau rānei, he tohu pai tēra ki te Pāti Māori, ka riro māna hei tohu i te kāwanatanga.

Ki tā Te Ururoa Flavell, mena ka noho hei hoa haere, kāore e kore ka puta ngā pāinga. Me tana āki nei, ko te mana kei roto i te kāwanatanga me āna hoa haere.

Ahakoa te wehenga nui, e ai ki ngā tatauranga a Colmar Bruton kua paku neke whakarunga a David Shearer, he pēra anō te pai o ngā whika kua kohia mōna e Reid Research. 

E ai ki te Pāti Māori ka taea e rātau te mahi tahi me wai ake rānei, ēngari ko te whakatūpato a Te Ururoa Flavell ki a Shearer, me aro mai ia ki te kaupapa Whānau Ora.

Nō reira kua tae moata mai te Kirihimete ki te Pāti Māori.  Mā te wā e whakaatu kei a wai rānei te taonga nui ake mā te Pāti Māori.