Kua whakaritea e Amerika ko Obama te tangata

He rae ki te rae te pakanga ki waenga i te perehitini o te wā a Barrack Obama o te rōpu Democrats, raua ko tona hoariri a Mitt Romney o nga Republicans. Inā ka noho tonu a Obama hei Perehitini mo te whenua o Amerika mo te whā tau ano. Ehara ko Amerika anake te whenua i te kaha whai haere i nga nekenekehanga o tenei kaupapa whakahirahira, mei kore ko te aō ano tera.

I te papara o Chicago i Poneke i te wā o ngā pōti i kaha tipu ake te wairua hihiko nā runga i te mohio i puta te ihu o tā ratou tangata ki te tu hei perehitini ano.

I Hawai'i a Te Kāea i te wā o te pōtitanga nui o Amerika e mātakitaki haere ana i ngā nekenekehanga o te wā. Na tona tipu ake ki te whenua o Hawai'i he mama noaiho te mahi mo Obama ki te kapo i ngā pōti o taua waahi. I te hapori Moromona Ilaie, he māro rawa ngā taunaki mō te Perehitini tuatahi nō aua moutere .

Ki Aōtearoa nei he nui anō te hunga i whakapaetia ko Obama tera ka whakaihuwaka, ko ta te Minita o nga take Māori a Pita Sharples “ i roto i toku ngakau i te mohio au ko Obama te tangata”.

I tua atu i te ōhanga me nga take hapori, kua ara ake te tae o te kiri he take whakaoriori i ngā kaipōti. Ki tā ngā tatauranga e pōti ana te nuinga o nga kiritea mō Romney he ahuatanga tihohe mā ētahi. He tono i puta mai te kaiwhakahaere o te rōpu Mana ki ngā kaipōti o Aotearoa kei Amerika e noho ana “ kia kaua e tuku atu te pōti ki te tangata kaikiri, pera i a Romney”. He ōrite ano hoki te korero a Te Ururoa Flavell “E aro ana tonu te ao Māori ki a Obama nā runga i te ahuatanga o te kiri.

Ahakoa te wairua harikoa o Obama me aana kaitautoko i tenei wā, e mohio pū ana he mahi nui kei mua i a ratou aroaro ki te whakatutuki i ngā oati maha mo te ōhanga o Amerika me te maha noa atu o nga kaupapa nui hei whakapakari i te tū o taua whenua me nga whānau ō roto.