Kua karawhiua e Evan ngā Moutere

Ko te mataku a ētahi, he kino ake tenei āwha i a āwha Kina i pā ki Whīti i te tau iwa tekau mā toru. He rua tekau mā toru i mate i taua wā.

Ko te whakapae a ngā mātanga huarere, katahi te āwha kino, ko Huripari Evan. Kua whakaritea he ope ohotata, he whare whakaruruhau e toru rau, kua noho takatū ngā Pirihimana me te Ope Kātua i Whīti. Kua oati te Pirimia o Aotearoa, a John Key ka tukuna atu he tautoko, te ahua nei he koha pūtea.

Inā kua kitea, kua rongohia te Āwha o Evan ki ngā moutere o Hāmoa i ngā rangi kua hipa, ā, i te rā tonu nei , i tau atu ia ki ngā moutere o Whīti me ngā hau, kotahi rau waru tekau kiromita te tere. E ai ki ngā korero ko nga wāhi noho kei te taihauāuru o Whīti, i pā kinohia tuatahitia, i tae hoki a Evan ki te pito o te motu, ki Nadi i te toru karaka i te ahiahi nei.

Kua whakakorengia ngā rerenga ki Nandi, atu i taua wāhi hoki , kua hua ake he waipuke ki te raki, kua puta hoki te awangawanga nui mo ngā moutere i te uru, rua mano whitu rau te tatau o te hunga tūruhi kua hoki ki tuāwhenua atu i ngā moutere o rāwaho.

I tenei wā tonu e whakatika ana a Hāmoa i a ia ano, whai muri i tana rongo i te ngau o Evan. Ki tā Paraone Tai Tin, he uri nō Ngāti Hine, nō Hāmoa hoki , nā te torotoro atu ki tona papa me tona whanau mā te ipurangi, me te wāea ka puta te rongo pai.

Ko tāna ahakoa kei te noho kainga kore te tokomaha, ko te mea pai ki ā ia kei te ora katoa tona whanau, ahakoa te mahi nui kei mua i te aroaro ki te whakatikatika i tā rātou nohonga ki reira.

Ahakoa te kino o te taiāniwaniwa i pā ki Hāmoa i te tau rua mano ma iwa, he nui kē ake ngā pākarukarutanga kua hua ake i a Evan. Tokowhā hoki ngā tangata kua mate, a, e whā mano e noho kainga kore ana. Kei te takiwa o te rima i runga i te kauwhata āwha, te kaha o te ngau o Evan, kua rāhuitia a Whīti mo te rā katoa.