Kaupapa: Child Abuse

Kāre he hāmene anō mo te matenga o ngā māhanga Kāhui

He whakaritenga tēnei kua ara ake i te putanga o te pūrongo a te kaitiro tūpāpaku matua a Garry Evans whai muri i tētahi tirohanga ki te matenga o ngā māhanga Kāhui mo ngā wiki e toru. E ai ki te kaitiro tūpapaku a Evans i tukino kino rawa atu ngā māhanga i raro i te maru tiaki o tā rāua papa a Chris Kahui anake, Tapiri ki tera ko tāna kare i a i te whakapono ko Macsyna King tera i te tūkino i a rāua.

I mate ngā māhanga Kāhui i te tau rua mano mā ono, ā nā te noho mū a te katoa o te whānau i taua wā i tōroa rawa hāere ngā mahi me te tirohanga a ngā pirihimana.

Ko tā ngā pirihimana kua āta arotakehia e rātou ngā korero katoa o te kaitiro tūpapaku matua, kua hoki ano rātou ki nga tirohanga tuatahi o tēnei kēhi, a ao ake te whakaritenga kia kore e hāmene tētahi atu mo tā rāua matenga, heoi ko tā rātou ano kei te noho huaki tonu te kēhi.

Ko tā tētahi o ngā mema o te kāhui ā Iwi a Naida Glavish, he moumou te taime me te pūtea i whakapouhia e te Kāwanatanga mo te tirohanga a te kaitiro tūpapaku, ko te tikanga me whakapou aua pūtea kē ki te whakatinana kaupapa ka tāea te aukati i aua mahi.

Ko tāna ano, ahakoa kua tae te wā mo ngā hapu, me ngā iwi ki te whakatika i enei raru ki waenganui i a rātou ano, i te hē ano hoki ngā ratonga Kāwanatanga me nga kaimahi i utua ki te whakarite kaupapa aukati i aua mahi. Ko rātou ano hoki ēra kihai i tāea te manāki i aua pepi me ēra atu kua hinga nā te ringa tūkino.

Me whakamaumahara te motu ka tika i nga āhuatanga pouri i pā ki ngā tāonga Kāhui, heoi ko tāna ano kua tae te wā kia huri te katoa ki te aukati i enei mahi ahakoa Māori mai, Pakeha rānei.