Haere Rā Petrobras

E manahau ana a Te Whānau-a-Apanui me Greenpeace ki tā Petrobras mahue i āna raihana hōpara kōhinu katoa i Aotearoa nei.

He raihana e rima tau te roa i tukuna ki te kamupene kaitā nei nō Brazil i te tau rua mano tekau, kia āta tirotiro i te 12km o te papa moana i te riu o Raukūmara, kimi kōhinu ai. I totohe atu a Te Whānau-a-Apanui me Greenpeace i taua whakaaetanga a te kāwanatanga.  Heoi, e ai ki te Pirimia i tēnei wā, ehara ko aua tohe te take i makere iho ai a Petrobras.

Kua huri tuarā a Petrobras, me te hūrō hoki o Te Whānau-a-Apanui.

Ki tā Dayle Timutimu, te roia mō Te Whānau-a-Apanui, ehara tēnei i te wikitoria mō te iwi anake, ēngari he wikitoria mō te taiao, mō te Raukūmara.

Inā kē te huhua o ngā take o tā Petrobras whakahoki i āna raihana wiri hinu i te Raukūmara.  Ko te heke o te pūtea a te kamupene mo te wā tuatahi i ngā tau 13 tētahi, me te heke haere o te wāriu o te kamupene, mā tōna 40%.

I tīmata tēnei pakanga 2.5 tau ki muri, a, ahakoa te uruhau inaiānei, hei tā Takitimu anō, he mea whakapiko tuarā, taiakotikoti hoki i te hinengaro.

Ahakoa ngā tini rautaki aukati a Te Whānau-a-Apanui, me Green Peace anō hoki i ngā mahi keri i tō rātou kāpata kai, kāore hoki a Takitimu i te whakapono, he hua tēnei wehenga, o ā rātou mahi.

A, ahakoa ka rere nga hui whakanui i tēnei kowhiringa, nā te hiakai a te kāwanatanga ki tērā pūtea, e mea ana rātou, arā anō ētahi kamupene wiri hinu e aro ana ki Aotearoa.