Waikato University graduate first to write MBA research in Māori

Nō te rā nei, whakanuia ai te whakapōtaetanga o te ope tuatoru o ngā paetahi o te tohu paerua mō te whakahaere pakihi mai i Te Kāreti Rangahau, Whakawhanake hoki o Waikato-Tainui me Te Whare Wānanga o Waikato. He tuatahi hoki mō Te Whare Wānanga tā Te Puna Moanaroa tuhi i tāna rangahau mō te whakaoranga mai o tōna reo ā-iwi i roto katoa i te reo Māori.

Kua riro mā Te Puna Moanaroa te hōnore nui hei kaikauwhau poroporoaki mō ngōna hoa, ā, e manahau ana tōna wairua

“E koa ana e hurō ana te ngākau, e rere ana te wairua ki ngā karamatamata o te rangi, nā te nui o ngā mahi kua oti nei i a mātou katoa ko ōku hoa i roto i ngā tau e rua kua hori nei.”

Ko Moanaroa tētehi o paetahi e iwa, kua eke whakaihu waka.  E manawa nui ana te kaiako i Te Wharekura o Manaia mō te oranga tonu o tōna mita, ka mutu, koirā te matū o tana tuhinga ā reo Māori.

“Ko te kaupapa matua Te Whare Kōrero Tāhūhū o Hauraki, e kimi ana i tētehi rautaki e ora ai, e whakahaumaru ai i te reo o Pare Hauraki nui tonu.”

Hei tā te māngai o Pare Hauraki a Korohere Ngāpo, “Kāore ano te reo o te kainga kia eke panuku, kia eke tangaroa ki tōna kōtihitihi, he oti anō, he tīmatanga, he tohu pai tēnei, nā te mea, e ai ki ngā kōrero, koia te tuatahi kia tuhia tana tuhinga roa, tuhinga whakapae i roto i te reo Māori mō tēnei hōtaka, nō reira, e noho whakahīhī katoa a Pare Hauraki ki āna mahi, kua oti i a ia.”

Nō te tau rua mano tekau mā tahi i tīmata ai te hōtaka Tohu Paerua Whakahaere Pakihi a te Kāreti i te Whakaaetanga mahi ngātahi ki Te Whare Wānanga o Waikato.  Na ngā rangapū e rua ki mua i para te huarahi mō Te Puna mā, kia whiwhai ai rātou ngā hua.

Hei tā Moanaroa, “Otia, ehara i te mea ko au te tuatahi, kua tono atu kia reo Māori te tuhinga, i te tuhinga whakapae. I roto mai i ngā tau, i ngā rangapū o mua nei, i tīmata mai i a Brad mā i tono atu rātou ki te Whare Wānanga kia tuhi hoki ratou ki te reo Māori, ko au noaiho te tuatahi, i whakaaetia mai kia tuhi ki tō rātou reo rangatira.”

E ai ki te Heamana o Waikato Endowed Colleges Trust a John Heremia, “Ko te wāhanga nui ki a mātou, me pēhea te āwhina i ngā iwi e whakarite ana i wā rātou kaupapa āwhina tiaki i a rātou mahi.”

Nā te īnoi a Kiingi Tuheitia, ka tirotiro atu ngā rangapū e tū nei ki te whakarauora o ngā awa me ngā wai.  

Tuaritia: