Report criticises lack of progress in Māori education

By Heta Gardiner

He rīpoata kei te tātā i ngā rautaki o te kāwanatanga ki te whakapakari i te eke o ngā ākonga Māori i te kura. I roto i tēnei aromatawai mō te mātauranga Māori, e tohea ana te rautaki 'Ka Hikitia' mō te kore o āna hua, ēngari e ai ki tētahi tūmuaki kura kaupapa Māori, i noho ki rō kura auraki mō ngā tau tekau mā whitu, kei ngā kura kaupapa te rongoā mō ngā raru e pēhi nei i ngā ākonga Māori.

He ripoata anō ēngari kua ōrite anō te hua. E ai ki a tumuaki Mark Bradley, kotahi noa te rongoā.

Hei tā Bradley, “He Ngāwari. Waiho mā te Māori te Māori e kuhu.”

Mō ngā rima tau kua hori kua aromatawaihia te Mātauranga Māori. E ai ki te ripoata whakamutunga o te aromatawai nei, e hanga pōturi ana te māturuturu mai o ngā hua o ngā rautaki whakapakari i ngā ākonga Māori. I tohua ko "Ka Hikitia" tētahi o ngā rautaki kāore i te eke.

Hei tā Bradley, “Kua pai ētahi āhuatanga kua puta i ngā rautaki o te kāwanatanga, ēngari he nui ngā pūtea kei te whakapauria i runga i te kore.”  

Ko tā Bradley, ko te aronga hoki o ngā rautaki e hanga rangirua ana.

E ai ki a Bradley, “Ko te kōrero o te kāwanatanga ki roto o 'Ka Hikitia' kia eke te Māori hei Māori. Kāore hei Pākehā.”

E ai ki ngā tatauranga ka teitei ake ngā whiwhinga mātauranga o ngā tamariki Māori ki rō kura kaupapa Māori, ki ērā o kura kē. Ēngari ko te raru, ko te nuinga o ngā tamariki Māori kei rō kura auraki.

Hei tā Bradley, “E tika ana kei reira te nuinga o ngā tauira Māori ēngari, me whai rautaki kia whakawhiti mai rātau ki tēnei taha.”

Kāore te Minita Take Mātauranga i wātea ki te kōrero ki runga kāmera mō te kaupapa nei. 

Tuaritia: