Kaupapa: Education

Me whakapakari te whanaungatanga i waenga i ngā whānau Māori me ngā kura

He mahi nui tonu kei tua mo nga kura me nga whānau Maori ki te whakapakari i te ara whanaungatanga i waenga i ā rāua, e ai ki te ripoata a te Mana Arotake o Aotearoa.

He pūrongo nui i runga i te mōhio mā te pakari o te whanaungatanga e eke ai ngā tamariki Māori ki te taumata kairangi o te mātauranga, hei tā te kāwanatanga.

Me hoki atu nga kura ki te papa tuhituhi, koina ta te tumuaki o mua, ta Kelvin Davis.

Hei tā Davis, “Wera mea iti noaiho te hariru, te menemene, te kōrero, te tono ki te whānau kia haere mai ki te kaputi i roto i te ruma o ngā kaiako wera tūāhuatanga.”

E ai ki nga tatau, e ono tekau ōrau o ngā whānau e whakapono ana, he pai te whanaungatanga me o rātou kura.

Heoi, e iwa tekau ōrau kē o nga kura e whakaaro pēnā ana hoki.  He rerekē mā te toru tekau ōrau.

Ko te whakatūpato a te Mana Arotake Mātauranga o Aotearoa kia kaua ngā kura e noho hāneanea.

Engari, e ai ki te Minita, ehara nā ngā kura te hē.

Hei tā Hekia Parata, “Nā, ko te whakahoki mai ki au ahakoa ka pērā rātou, he uaua te hono mai a ngā whanau, nāreira ko tāku i tēnei wā ki ngā whānau, ki ngā hapū, ki ngā iwi, whakatata atu ki to kura.”

Kāti e ai anō ki te pūrongo, karekau i te rahi o ngā kura tētahi kaupapa here mō te whakapakari whanaungatanga me ngā whānau Māori.

Ara, e rima tekau ōrau e mea ana ae he kaupapa here tā rātou. E whā tekau mā whā ōrau e mea ana kao.

Ki tā Pita Paraone, “Mēnā kahore rātou e hiahia ana te whakātu i wēnā kaupapa he moumou taima kia kōrero atu i a tātou te kaupapa nei.”

Mō ngā tauira Māori, i uia te pātai pēnā e whai whakaaro ana te kaiako ki tō rātou Māoritanga.

E whitu tekau ōrau e mea ana ae. Engari he toru tekau ōrau e mea ana kao.

E ai ki a Davis, “He mea tika tēnā. Te nuinga o mātou kaiako he kaiako Pākeha, te nuinga o rātou horekau i te tino mōhio horekau rātou e rata ana ki ngā tikanga ngā kaupapa Māori te ao Māori.”

Hei tā Parata, “Mo ngā tauira Māori ko Aotearoa tēnei nē, me mōhio, me matua mōhio ko wai ēnei tamariki he aha o rātou whakapapa he aha ngā kōrero e pā ana ki tēnei iwi ērā āhuatanga katoa.

Ko te tirohanga inaianei mō Te Tari o Te Mana Arotake o Aotearoa ko ngā rauemi e hāngai ana ki te rangai mātauranga, ā, rānei mēnā e whai hua ana mō Ngāi Māori.