Kaupapa: Education

Kua whakamutua te tono ā-ture ki TWoA e te tumuaki ō-mua

Ka kore e ahu whakamua te tohe a Tākuta Rongo Wetere ki rō kōti mō Te Wānanga o Aotearoa, te wānanga i noho atu ai ia hei tumu whakarae i tōna wā.

Neke atu i te tekau mā tahi miriona tāra te wāriu o tana wero, i whakapae ai, kua takahia ōna mana whakairoiro hinengaro me ōna mana tā.  Hei tā te tumu whakarae onāia, he tohe hōhā noa nei.

He tāna, “He tino hoha tērā, ko te mea nui i tēnei wā, ki te huri tātou katoa ki te kaupapa rangatira o Te Wānanga o Aotearoa.”

I te mutunga mai o te tau rua mano tekau mā whā, i puta ngā rīpoata e mea ana, nā Te Wānanga tonu i kape te katoa, te nuinga hoki o ngā mana ki ngā whakaaro o Te Tohu o Te Ara Reo Māori, me te mea hoki rā nā Te Kura Tini o Ngā Waka, te mana hoki ki ērā rauemi. 

Hei tā Mather, “Kei te tino mōhio au kua tau ngā amuamu i roto i te whakaaetanga i waenganui i te rōpū Aoteroa Institute me Te Wānanga o Aotearoa.  Kāhore a Rongo Wetere mā kia hoki mai ki te Wānanga o Aotearoa ki te haere tonu ki tēnei mahi. ”

I ngana mātou o Te Kāea ki te whakapā atu ki a Rongo Wetere rāua ko Susan Cullen engari auare ake ā, ko tā te Wānanga, horekau kē rātou i whai whakaaro kia tuku pūtea hei whakatau i tēnei take.

Hei tā te Taiurungi kua mārakerake rā te ara whakamua mō te waka, e koke nei ki te whakatinana i tō rātou rautaki roa.