Kua piki ake te pūtea tautoko mo te karahipi Ngarimu VC

Kua whakahoungia ētahi wāhanga o te Kaupapa Karahipi o Ngarimu VC kia whai māramatanga ai ngā rangatahi o enei rā, ki te orokohanga mai o tenei pūtea taunaki tauira.

I tua atu i ngā karahipi ka tukuna mo ngā tauira autaia ki ngā tuhinga roa, he aronga ki te ao hāngarau me tetahi haerenga whakamiharo mo te hunga toru tekau ka waimarie, ki ngā wāhi i tae atu ngā hōia Māori i te pakanga tuarua o te ao, hei te marama o Pōutu te rangi i tēnei tau.

Ma te whakaatu i ngā tauira ki ngā wāhi i hikoia e o rātau tupuna Māori o te ope 28 i te pakanga tuarua o te ao, ka whai māramatanga hōu ratau ki ngā whakahekenga tōtā a o ratau tupuna, koinei te whakahau a te Minita take Matauranga, mo tetahi o ngā whakahoutanga ki te kaupapa tuku karahipi o Ngarimu VC.

I tua ātu i ngā tuhinga roa ka tukuna hei whakawātanga mo ngā karahipi whare waananga, kua puea ake ano tetahi momo kaupapa hei whakawā mā te tarahiti tuku pūtea, otira ko ngā mahi o te ao hāngarau hōu.

Ko David Jones tētahi i waimarie ki te whai i tēnei karahipi i ngā tau kua taha, hei tāna he tino hua o roto mōna.

Ka tuwhera mai te kuaha tuku tono hei te Pōutu te rangi, ka kapi hei te marama o Mahuru. mo ngā whakamahukitanga katoa, tēna whakapā atu ki te taunga ipurangi a te Manatū Matauranga.