Ngā kaupapa: Education, Investigation

Kua kaha whakararu ētahi kaimahi i te ingoa o te Whare Wānanga o Awanuiārangi

E manawa pā ana te Tāhūhū rangapū o te Whare Wananga o Awanuiārangi, i ngā mahi hīanga a tētahi rōpu kaimahi tokoiti, hei tāna kua kaha whakararu i te ingoa o te Wānanga.

Ko te kaupapa ako Tāpoi Māori tēra o 'Hei Manāki' te pūtake o tētahi arotakenga a te Komihana Whare Wānanga me te Mana Tohu Mātauranga o Aotearoa, kua hua ake i te whakahokitanga atu o ngā pūtea 5.9 miriona ki te Komihana whare wānanga, me te tangohanga o ētahi tiwhikete ako e rua rau tekau mā whitu, i ngā ākonga o te tohu nei.

Kua pokea te Whare Wānanga o Awanuiārangi e te whakamā, i te whakakorenga o ngā tohu tāpoi Māori i raro i te hotaka ako e kīa nei ko 'Hei Manaaki', ki ngā tauira 217, i runga i ngā kitenga e mea ana kaore i tutuki i taua hunga ngā paearu, me ngā hāora ako, mo te tohu rā.

I hua ake ngā kitenga nei i tetahi whakatewhanga nā te Komihana Whare Wananga me te pakihi ōtita o Deloitte, i āta whakatewhatewha i ngā whakahāere o tenei tohu

He tata ki te kotahi rau ngaa kaitakaro me ngā kaimahi o te Kapa Warriors kua herea ki te whakatewhanga i tēnei Tohu Tāpoi Māori, me ngā kitenga e mea ana i hipa te tohanga pūtea ki te tohu nei, mā te 5.9 miriona tāra

I kapo i a matau tēnei te rā kotahi i mahi tahi te ope Warriors me ētahi o āna Kaimahi, ngātahi me ngā kaiako o te tohu Tāpoi, ko tōna tikanga he 18 wiki te roa o ngā mahi ako kia tohua te ākonga, heoi i te paunga o te rā kotahi, i riro ki ia o ratau, te tohu.

Hei tā te heamana o te kapa Vodafone Warriors, a Bill Wavish, i tutuki i a rātau ngā mahi katoa i tohua e o rātau kaiako o te kaupapa Tāpoi Hei Manaaki, hei āpiti atu, māmā noa mā rātau te mahi ngātahi me ngā Kaiwhakatewhatewha i tēnei take.

Heoi, arā tonu ngā māharahara a te Komihana.

E whakatewhatewhatia tonutia ana ētahi o ngā tāngata whai pānga ki ngā whakahāere o te hōtaka o Hei Manāki, e te Tari Hara Taware.