Kaupapa: Education

Kei te whakanui ngā kura kōhungahunga a Whānau Manaaki i te ao Māori

updated

Ko te rōpū Whānau Manaaki tētahi o ngā huihuinga kaitā o te motu i te rāngai mātauranga kura kōhungahunga. Ki Te Papa Tongarewa tū ai te hui ā-tau hei taunaki i ngā kaiako me ngā kaimahi, ā, nā ētahi tipua Māori i whakatakoto kōrero mai i te tirohanga Māori e pā ana ki te whakaako tamariki kōhungahunga.

Ko Hana O'Regan te Kaiwhakahaere Oranga o Te Rūnanga o Ngāi Tahu. I tae atu a ia ki te kōrero ki te whakaminenga e pā ana ki te tuakiri Māori me ngā tikanga. Hei tāna, “Kua tae te wā kia whai whakaaro rātau ki te tokomaha o a tātau tamariki Māori i raro i o rātau parirau whakaruruhau.”

He rōpū moni hua kore a Whānau Manaaki e pīkau ana i ngā kura kōhungakunga waru tekau mā rima mai i Te Whanganui-a-Tara ki Horowhenua.

Ko Matiu Te Huki te kaitakawaenga Māori mō Whānau Manaaki. Hei tāna, “He tino nui te hiahia o te Whānau Manaaki o Tararua ki te ako i ngā reo Māori me ngā tikanga Māori mai i ngā kaiwhakahaere ki ngā kaimahi katoa nō reira he tino nui te hiahia o te whānau nei ki te tipu.”

Neke atu i te rima mano ngā tamariki kei ngā kura kōhungahunga a Whānau Manaaki, ā, rua tekau ōrau he Māori.

E ai ki a Matiu Te Huki, “Kotahi mano ngā tamariki Māori kei roto i ngā whare kōhungahunga o te rohe nei, ēngari kei te pīrangi mātau kia ako ngā tamariki katoa i ngā mea Māori ki te whakapakari ngā mea Māori ki roto i tēnei whenua.”

Hei tā Hana O'Regan, “Kua hikina tērā mānuka i hikina e rātau ka mutu kei te karawhiu i tā rātau whai i tēnei i kaupapa arā ki te whai ki te rapu i te ara hei hāpai i te taha Māori o ēnei tamariki Māori.”

He pānga tō te ingoa Whānau Manaaki ki a Tā Tāmati rāua ko Māreikura Tilly Reedy nā rāua i whakaheke werawera ki ngā kura kōhungahunga, i raranga hoki i te marau whakaako arā, Te Whāriki.

Ko tā Hana O'Regan, “Kia whakarangatira anō te mana o te ao Māori te mana o te tamaiti me tona ao Māori i roto i ērā kura.”