Ngā kaupapa: Business, Education

Kei te werohia te rangatahi kia whakawhanake i ōna whakaaro

Ko Te Wero Pakihi he kaupapa whakawhanake tauira pae ono pae whitu Māori o Aotearoa ki te whai i ngā huarahi umanga hei oranga mō te iwi.

He wiki whakawhanake whakaaro, ā, kua puta ngā ihu.

He tauira a Sienna Munford-Stokes (Ngā Puhi) ki Te Kāreti o Okaihau. Hei tāna, kua puta te hiahia ki roto i a ia ki te whakatū umanga ināianei.

I werohia ngā tauira kia rapa huarahi whakawhanake pakihi, i tēnei tau ko Araraurangi Aotearoa.

He tauira a Hinemihi Taylor ki Te Kura Tuarua mō ngā Kōhine o Rotorua. Hei tāna, kāore rātou i mōhio ki ngā āhuatanga kei Air New Zealand i mua i tēnei kaupapa.

I ngā tau e rima kua hipa neke atu i te 200 ngā tauira kua puta i te Te Wero Pakihi.  He kaupapa nā ngā Wahine Whakawhanake Māori i whao.

E ai ki te Heamana o MWDI a Kataraina O'Brien, "Nā te mea kua whiwhi pūtea wā tātau iwi huri noa i te motu ko te mea nui me kaha ake ngā pūkenga o wā tātau rangatahi."

Hei tā Te Minita Take Māori a Te Ururoa Flavell, "Ko ētahi ka kī atu kua āhua tāmia rawatia te āhuatanga o tēnei mea ki roto i a tātau ko tāku ko te kī atu kao me timata anō tātau ki te akoako ki te whai i tēnei huarahi ana koia te āhua o tēnei wānanga."

Kua rāhuitia e Araraurangi Aotearoa i ngā whakautu a ngā tauira, heoi ka whakairia ngā kauhau tauira ki te whārangi Pukamata a ngā Wahine Whakawhanake Māori hei ngā wiki e heke mai nei. Tirihoa ngā hononga ipurangi kei raro iho.

https://www.facebook.com/M%C4%81ori-Womens-Development-Inc-487121188099674/

http://www.mwdi.co.nz/