Ka tū ngā rangatahi o Tāmaki ki Te Waiata Nui

Leah Te Whata

Kei ngā mano te tokomaha o ngā tauira ka eke atu ki te papa whakataetae o The Big Sing ki Tāmaki Makaurau me te wawata ia kia whai tūnga rātou ki te whiringa toa ā-motu. Heoi, ko tā ētahi tauira ehara noa tēnei i te whakataetae engari kē he hiringa wairua, he nohonga anō hoki i raro i te āhurunga o te mahi tahi.

Ko ngā reo o te hunga rangatahi ki Tāmaki Makaurau ka rangona i te rangi tuatahi. Kua kotahi tau e whakaharatau ana kia eke ki tēnei taumata.

E ai ki te kaiwaiata, ki a Molly Griffiths ki a Te Kāea, me hoki mai tēnei kaupapa ki ngā kura.

Ko te waiata te kairangitāmiro i te tangata, ā, ko tā ētahi, kua pūrangiaho rātou i ēnei mahi.

Nō te tau kotahi mano iwa rau waru tekau mā waru tīmata ai te kaupapa Secondary Schools' Choral Festival, ā, i tēnei tau, ko tōna tekau mano tauira nō ngā kura rua rau rima tekau o te motu ka uru ki ngā whakataetae ā-rohe.

E whitu tekau ngā tira nō Tāmaki, nō Te Taitokerau anō hoki ka tū i ēnei rangi e toru, ā, ka eke ngā kapa toa ki te whakaaturanga ā-motu ki Te Whanganui-a-Tara hei te Here-turi-kōkā.