Kaupapa: Education

He tatauranga kua puta e kii ana kua uaua te whai tohu ki ngā kura pōhara

updated

E ai ki ngā tatauranga o te wā, he nui noa atu ngā tamariki ka haere ki ngā kura pōhara, ka puta kore tohu atu, i ēra ka haere ki ngā kura whai rawa.

Heoi, hei ta ētahi mema o te Rūnanga o ngā Kura Kaupapa Māori, ehara tēnei i te raru ki o rātou kura, me te aha, he tini ngā kura kaupapa kei ngā hapori pōhara rawa.

Hei tā te tūmuaki o te kura taumata tahi, arā ko Te Wharekura o Manurewa, horekau he patanga to te pōharatanga i roto i ngā mahi ako.

Hei tā Maahia Nathan mō Te Wharekura o Manurewa, “I roto i a mātou nei māka, ahakoa pehea te pōhara o te hapori e ahu mai ana ngā tamariki nei, ko te mea e kite ana e eke ana rātou ki nga taumata mō te taha ki te NCEA 1-3.”

Puta ake ana ngā kōrero nei i te putanga mai o ngā tatauranga e mea ana, ko ngā akonga e ahu mai ana i ngā Kura Taumata Tahi ki te Toru, he whanui noa atu te tupono ka puta rātou horekau he tohu, inā whakatauritetia tāra āhuatanga ki ngā Kura Taumata waru ki te tekau.

Nā whai anō, ahakoa kei ngā kura auraki te nuinga o ngā tamariki Māori.  Hei tā Te Rūnanga nui o Ngā Kura Kaupapa Māori, ko ngā Kura Kaupapa Māori Aho Matua tētahi o ngā tauira whai hua ā-mātauranga mā te Māori.

Hei tā Rawiri Wright ko te tūāpapa o tērā pūnaha mātauranga e hē ana, ā, me titiro anō Te Tāhūhū Mātauranga ki te tūāpapa, nā rātou anō te pūnaha i hanga.