Kaupapa: Ngā Manu Kōrero

Hakoa hua mai ko Aituā, haere tonu ngā ākonga nō Whanganui ki Ngā Manu Kōrero

I pōhiritia ake te mano tini ki runga o Tūrangawaewae Marae i te rā nei mō te whakataetae Manu Kōrero mō ngā Kura Tuarua ka tīmata ake, ki Kirikiriroa āpōpō.  Hakoa i raru te pahi i te kawe mai i tētahi tira nō Aotea rohe, i tae ā-tinana tonu ētahi o rātou.

Hakoa heke ana ngā roimata o Ranginui, whakaeke tonu mai ana ngā kura o te motu.

I te haerenga mai o ngā kura tuarua o Whanganui ki konei, ka tuki tō rātou pahi i te Tonga o Taumarunui, i whara ētahi kaiako me ētahi ākonga hoki, ā, i noho tētahi ākonga ki te hōhipere inapō.

10 ngā ākonga i hoki atu ki Whanganui inapō, hoino hei tā tētahi kaiako, nā te nui o te kaupapa, ka tae tonu mai rātou i te rā nei.

Nā Waikato-Tainui te reo pōhiri i tēnei tau, ā, ko Kaharau Keogh tērā o Ngā Taiātea Wharekura, te whakaihuwaka mō te wāhanga o Pei Te Hurinui i tērā tau.  Hei tāna, ehara i te mea e wawata ana kia puta tuatahi anō ia.

Kua whakatau mai ngā matawaka nō ngā tōpito o te motu ki roto o Waikato-Tainui, hei āpōpō ka rongohia ake ngā reo o ngā tuakana o te whakataetae, arā ngā pūkōrero ka whai wāhi atu ki ngā wāhanga Pei Te Hurinui, o Te Korimako hoki.