Kaupapa: Education

E mahi tahi ana Te Kura Māori o Ngā Tapuwae hei whai i te aronga matua

He rā whakanui, he rā kohi pūtea, he rā whakamaumahara anō hoki, koia tera i tū ki Te Kura Māori o Ngā Tapuwae i te rā nei, ā ko te aronga matua, he kura hou.

Ahakoa te pūtea a te Tāhūhū o te Mātauranga, he kaupapa ake anō tā ngā whānau e wawatatia nei, arā kia tū he wāhanga o te kura hōu hei maumaharatanga mō tō rātou kuia, mō Pani Stirling.

Kei te whakanui te Kura Māori o Ngā Tapuwae i ngā taumata tiketike kua ekea e a ratou tauira, i roto i ngā mahi whai matauranga i ngā kura, i waenga i o ratou whanau, i waenga ano hoki i te hapori.

Ko tā Mark Rangipuna, “Ko tetahi tino wāhanga ko te tautoko a te whānau penei i te ra nei, he rōpu takitoru ko te kura ko te tauira me te whānau, ma reira ka eke ai ngā tauira ki ngā me kii ra te taumata o te matauranga.”

E mārama ana ngā tauira ki ngā hua ka taka mai i te pukumahi, i te whakaheke werawera, he haerenga nui te waimaria, pērā i tētahi haerenga ki Hawai'i.

Ko tā Mark, “Kia kite ēnei tauira i te aō, i ngā iwi rerekē engari rite tonu, kite i ngā ritenga i waenganui i ngā tangata Māori o Hawai'i me ngā tāngata whenua o Aotearoa.”

Hei te otinga ko te whakatū he kura hou te aronga nui mo ngā tauira, ngā whānau me te hapori o Te Kura Māori o Mangere, kua whakakotahi nei i runga i te moemoeā kia hangaia tetahi wāhanga o te kura hei maumaharatanga mo ta ratou kuia rongonui i hinga i tērā tau.

Ko tā Mark ano, “Ko tētahi wāhanga i roto i te kura he wāhanga ki te whānau, i whakaritea tētahi wāhanga maumahara ki a Pani Stirling, i te whā tekau tau koia tērā te tino poutokomanawa o te Kura Māori o Ngā Tapuwae.”