Kaupapa: Rio Olympics 2016

Whakatane High School celebrates its golden girl

Taroi Black
  • Waikato/Te Waiariki

Kei te rere ake ngā mihi a te Kura Tuarua o Whakatāne ki tētahi tino tauira ō-mua o rātou, ki a Lisa Carrington mōna e noho nei ki te pae koura o ngā Taumāhekeheke Orimipia. E mīharo ana ngā tauira o te akomanga Māori i te ekenga panuku a te hautipua o Te Aitanga-a-Mahaki i tēnei ata, ka whakanuia ki te tangi a te pīpīwharauroa.

He whakamihi nā tētahi o ngā kapa haka toa o te motu ki tētahi o ngā uri kei Rio. 

E ai ki tana kaiako o mua a Matua Te Kapua Riini, “He mihi maioha tēnei ki a ia. Pera ano i te taima i a ia i te kura i konei ia e kura ana i raro i te marumaru o Te Aka Matua, koia ano tēra e whawhai nei ki te kimi hāere i te huarahi tika.”

He mīharotanga a Lisa Carrington mo ngā tauira o Te Kura Tuarua o Whakatāne. Anei tētahi o ngā whakaahua a Carrington mai i te tau ruamano mā rima, kei mua i a ia ko tētahi atu hoa kaihoe o ngā taumāhekeheke ki Rio, a Jamie Lovett.

“Mai rāno i te timatanga i te tau tuaiwa tae raano ki te tekau ma toru koia tēra e whai ana i tēra kaupapa. I te wā i a rātou i konei he maha ngā kura e whai whai ana i tēra ara te waka kōpapa. Nōreira kei te whawhai mātou kia hoki mai te waka kōpapa ki tā mātou kura.”

E wha tau ki muri, ka pōhiritia te toa Orimipia ki Whakatāne. He rangatahi i toi tū ki ngā taumata whakaharahara i runga i te wai, ā, koia te wahine tuatahi o te āo kia riro i ngā metara kaura karapipiti mo ngā taumahekeheke o te āo.

“Ko te wawata me te tumanako inaianei kia tāe a Lisa ki tāna taumata e hiahia ana ia. Kei a ia te mahi nui inaianei. Engari ki tōku mōhio ka tae ia ki tēra kaupapa kātahi me te awhi a te whānau. Me ngā tamariki kei te taha i a ia ka pakeke ake ia. Noreira ki a koe Lisa, he mihi nui tēnei ki a koe.”