Ngā kaupapa: Rugby League, NRL

Whakahihi katoa ana te pāpā o Isaac Luke

updated

Ehara tana toa i te toa takitahi, he toa takimano kē.  Ko Isaac Luke te kāpene takirua hou o te kapa Kiwi rāua tahi me Adam Blair, Ko tētahi e mātua harikoa ana i ngā rongo kōrero o te wā mō Isaac, ko tōna Pāpā.

Kei tua o tāwauwau te tūtakarerewa mō George Luke.  Tika tonu, nō tēnei ata tonu whakaīngoatia ai tana tamaiti ki te tūranga kāpene takirua o te kapa Kiwi e takatū ana ki Ingarangi a tērā marama.

Ko Luke tētahi o ngā hainatanga hōu a te kapa Tamatoa, ā, ka utaina te taimaha ki ōna pokohiwi kia tika te arahi i tōna kapa Kiwi, tokoono o rātou he tauhou.

Ko George, ehara ia i te tauhou ki te hautū kapa.  Nāna i arataki ngā Rāpeti ki te taitara toa i te whakataetae takiiwa i te pito tuatahi o tēnei tau.

Kua toru tekau mā toru kē ana tākaro Kiwi, nā whai anō te huri a te kāhui kaiako ki a ia, kia kitea mai ētahi hua anō mō te kapa.

Ā, ko te whakapae a tēnei Pāpā kia hoki mai tōna tamaiti ki te wā kainga hei te Kohitātea, kia whakarite anō mō raurangi.