Whakahī ana te motu i te kaha a Tīma Aotearoa

Kua mutu te tatari, kua whakamoea te manako, kua hūreireitia te wikitōria.

Kua mau tonu i a Oracle te Ipu Amerika, i te patunga tuawaru karapīpiti o Tīma Aotearoa i te reihi whakamutunga i te ata nei.

Otira, kikī anō te puku o Tāmaki Makaurau i ngā kaiwhaiwhai e mātakitaki atu ana, i huataki ake i tā rātou huihuinga ki te haka.

He wānanga haka i whakahaerehia ai i te ata nei kia rite mō te reihi whakamutunga.

Nā reira, i mua tonu i te tīmatatanga e hia rau ngā kaiwhaiwhai i haka ngātahi me Jeff mā Tīma Aotearoa.

I tutuki hoki tā rātou whāinga i te tīmatanga o te reihi, ārahi ai a Aotearoa ki te māka tuatahi.

I haruru anō te whakaminenga i te kōkiringa whakamua a Aotearoa ki te māka tuarua.

He kaki ki te kaki te āhua o ngā waka i te tīmatanga o te wāhanga tuatoru, engari nā wai rā ka kitea te waka tere o Oracle kia puta tā rātou ihu ki mua.

Pērā i ngā reihi ō-mua, kahore a Oracle i hoki whakamuri, i whakawhānui ake te āputa ki waenga i ngā waka kia kapohia ake ai te Ipu Amerika.

Ahakoa te matekiri, kei te tautokona mārika tonu ai ngā kaiwhaiwhai o Aotearoa i a Dean Barker mā.

Ka mutu, koinei pea te wā whakamutunga ka tere anō ai a Tīma Aotearoa nā te nui o te uru kia whaia tēnei taonga.