Tūtaki mai ki a Shania Tatana

Tamati Tiananga

Tērā tētahi taitamawahine o Te Rarawa Kai Whare, me he whetū maiangi e mahuta ake ana i te pae.

He tekau mā rima tau te pakeke o Shania Tātana, kua tahuri atu ki ngā mahi whakapakari tinana o te tākaro mekemeke, nā runga i te manako nui, ka rite mārika ia mō ngā tauwhainga maha kei mua i tōna aroaro, ka mutu, kua riro mā tētahi māreikura Māori o te raki a ia e tohutohu.

Ahakoa e hararei ana ōna hoa, e whakaheke tōtā ana a Shania Tatana rāua tahi ko te kaimeke tautōhito nei a Daniella Smith ki te whakapiki hauora mā te mahi whakapakari tinana. 

I te Kohitātea o tenei tau i kōwhiria a Tatana ki te kapa NZ Pacific tekau mā rima tau i whakataetae atu ki te huinga Pacific Coast Slam i whakahaerehia ki te rohe Port Macquarie, Ahitereria me te aha, hei te tau e tū mai nei hoki atu ia ki taua tauwhāinga hei kaitākaro mā te kapa tekau mā whitu tau.

E ai ki te toa ō-mua o te tātua IBF Welterweight Wāhine o te Ao, kua whakaritea he mahere hauora e hangāi pū ana ki te whakatairanga i ngā wheako nui o te tākaro poitūkohu.  Kua piri tahi rāua i runga i te reo karanga o te papa o Daniella arā ko George tōna ingoa.

Ko te ārai te tūranga tākaro o Tatana, whā tau noa ia e whai atu ana i te tākaro poitūkohu, he toki i te kapa NZ Area Schools.

Kua kōwhiria anō ia ki te kapa wāhine pakeke o Muruwhenua, ā, ka whakamātauria  ia mō te kapa Tai Tokerau, he tekau mā whitu tau mō te whakataetae Aranga ki Te Raki Paewhenua.