Tuki atu ai te kapa U15 o Tāmaki ki Te Whanganui a Tara

Rahia Timutimu

Kei te whakataetae rīki ā-motu mō te hunga kei raro i te tekau mā rima tau, koinei te tau tuatahi kua whai wāhi atu te kapa whakawhanake o Tāmaki Makaurau, ā, i ngā rā e rua kua hori nei, kāore tonu rātou i hinga.

Nō te rangi nei tuki ai rātou ki te kapa o Te Whanganui a Tara, me te aha, he tukinga tātāhau mārika i pupū ake.

E ai ki ngā kōrero ko te kapa whanake o Tamaki te tuatoru o ngā kapa o te whakataetae riiki nei, ā, koinei tā rātou wā tuatahi ki tēnei tauwhainga.

Nāwai, i uru te kapa hei whakakikï i te rārangi kapa e waru te nui, heoi kātahi rātou ka whakaatu atu, e kore rātou e wawe turakina. E hinga-kore ana rātou, ā, no te rā nei i tuki rātou ki Te Whanganui a Tara.

I puta tere mai ngā Orca o Te Whanganui a Tara, me te whai i te piro tuatahi o te tukinga.

Heoi hoki atu, hoki atu, ka utua e rātou ngā piro, kia noho tekau mā rua ki ia kapa ngā tatau i te wehenga rua.

Ko ngā Orca anō tēra i whai i ngā piro e rua, kia noho ki mua.

Heoi ko te kapa whakawhanake a Tamaki tēra i whawhai ururoa, kia tutuki ai ngā piro e rua me tētahi whana, i kapo ai te wikitōria, rua tekau mā rima ki te rua tekau.

Hei te Rāmere oti ai te whakataetae.