Too little, too late for Parker

James Perry

I kaha a Joseph Parker i te mutunga Heoi, i te mutunga iho auare ake. 

I turakina a Dillian Whyte e Parker i te mineti whakamutunga o te whawhai i te taiwhanga O2 i Rānana, heoi ko te ringa o Whyte tērā i tū.

Hei tā Parker, inā ngā mātauranga mā ngā kaimekemeke e rua, heoi i kaha a Whyte i mua i ōna apataki o te kainga.

Nō tōna hinganga ki a Anthony Joshua i te Poutu te Rangi, ko te karo i tāna hinganga tuarua karapīpiti te whai a Parker. 

Heoi, i reira ngā tohu whakarapa i te rauna tuarua. Nā tētahi tukinga ūpoko ka taka a Parker ki te papa mō te wā tuatahi hei kaimekemeke ngaio.  Ka mutu, i te rauna tuaiwa i taka anō ia mō te wā tuarua mā tētahi meke o Whyte. I oho wawe a Parker.

Hei tā Whyte, he pakari a Parker, ahakoa te aha he rite tonu te hokinga mai o Parker, ka mutu koia hoki tērā i oti pai ake i te whawhai.

I ngā rauna e toru e toe ana, he horotete i tana hoariri te whai a Parker. Ka ngēngē haere a Whyte, ka tūrapa a Parker, i timata ngā pona o Whyte ki te wiri.

I te mutunga iho ko Whyte tērā i angitu, hei tā Parker e kore a muri e hokia, tekau mā rua ngā rauna mā rāua tahi, arā ko Whyte tērā i eke. 

Nā te wikitōria nei kua riro i a Whyte ngā tātua WBC Silver WBO International anō hoki. Kua tata anō ia ki tētahi whawhai ki a Anthony Joshua mō te tātua toa taumaha o te Ao.

Mō Parker, he hoki ki te kainga whai huarahi hou e piki anō ai ia ki ngā taumata ikeike o te ao, me tana ki taurangi, hei te peka tītoki hoki kaha rawa mai ia.