Kaupapa: Rugby

Tokorua ngā Ōpango Māori e ngana ana ki te whakapiki i tā rāua reo Māori

E huri haere ana te kapa Ōpango Māori i Hapani, he whakakitenga o te whutupōro me te ao Māori ki te ao.

Nā te ū ki ngā tikanga Māori e tū motuhake ake ana te kapa Ōpango Māori i te ao, ā, he āhuatanga tēnei i whakatenatena ai i ētahi kaitākaro kia whai tonu i tēnei huarahi i te kāinga.

Koia pū te mahi a Elliot Dixon raua ko Blade Thomson whai muri mai i te haerenga a te kapa i tērā tau.

I uru a Dixon rāua ko Thomson ki ngā akomanga reo Māori i tēnei tau.

I te pō tuatahi o ngā haerenga Ōpango Māori katoa ka tū te kapa ki te kōrero i o rātou pepeha, he āhuatanga kua titia ki ngā mahara o Dixon.

Kua mātau ake hoki te tokorua nei ki ngā akonga tikanga e whakahaerehia ana ia pō e te kaumatua o te kapa a Luke Crawford.

Kei te kitea hoki ō rātou whakapapa Māori ki ō rātou kiri, ā, mō Dixon he kōrero e hāngai hoki ana ki tāna haerenga i tēnei kapa.

Nā reira, aua atu i te mana o te kapa, kua mana anō rā te reo me ngā tikanga ki ēnei poutaha i tā rāua kuhu i tēnei poraka.