Kaupapa: Boxing

Tokorua ngā kaimeke kua eke ki tā rāua whakataetae Hoawhenua tuatahi

Rahia Timutimu
  • Tāmaki Makaurau
  • Ahitereiria

Ko Troy Garton rāua ko Tasmyn Benny ngā uri Māori hōu kei te kapa Hoawhenua o Aotearoa, nō te rangi nei whakaingoatia ai te kapa Mekemeke o te motu. Tokowaru ngā kaiwhawhai ka haere atu hei māngai mō Aotearoa, me te tūpono, kei te toronga o te ringa te mētara koura.

He menemene kua whakairotia ki te kanohi o te tauhou, o Troy Garton.

I tana wāhi mahi a Tasmyn Benny i tana rongotanga kua eke ia ki te kapa, heoi, he poto noa te wā whakanui i tēnei ekenga āna.

A, ka noho mātāmuri āna mahi whakapaipai, ko te whakaharatau kē te matua i mua i tana hoawhenua tuatahi. Ka whawhai ia ki ngā wāhine taumaha ake i tana reanga whā tekau mā iwa kirokaramu, hei whakarite i aia anō.

Koinei hoki te hoawhenua tuatahi mā Troy Garton. Tīmata ai te kaiwhawhai rua tekau mā iwa tau te pakeke ki ngā whakataetae kaporeihana, ināianei ko ia te toa Golden Gloves mō ngā tau e rua kua taha ake nei. Kei te noho ia ki te turanga tuawhitu o te whakataetae, heoi ehara tēnei i te aha.

Ka piki ake te rōpu Taumāheheke Hoawhenua o Aotearoa ki te tahi rau ono tekau mā waru, tekau mā rima ō rātou he uri Māori.