Te Whakataetae Ringa Mamau o Aotearoa

Wikitōria Day

Ko te whakataetae ringa mamau o Aotearoa tērā i kōkirihia ki Tāmaki Makaurau i ēnei rangi okioki, ā, i waenganui i ngā kaitākaro huhua i tae atu, ko te toa mō tēnei tau a Maateiwarangi Heta-Morris, nō Te Arawa me Ngāti Awa.

Ehara i te mea ka rarata te katoa ki tēnei momo hākinakina, hēoi, i whakakao mai ērā e ngākau nui ana ki te ringa mamau, pēnei i te uri Māori nei a Maateiwarangi Heta-Morris.

Ko ia te kaitākaro ringa mamau toa o Aotearoa, ko ia hoki kei te keokeonga o te whakataetae Oceania, hēoi, kāre ana angitūtanga e oti noa i konā.

Ko tāna, “i tae atu au ki te āta titiro ki te koi o ngā kaiwhakataetae na te mea e mohio ana au kei te whakapeto ngoi te katoa.”

I tēra tau i whai wāhi ia ki ngā whakataetae o te ao i Poland a i puta ia me te tūranga tekau ma tahi.

Kei roto ia i te wāhanga kotahi rau kiro karamu neke atu, ā, i tēnei tau ka rere atu ia ki Lithuania mō te whakataetae ā ao.

Nō reira, he kupu whakahau āna ki ērā e kōingo ana kia whakamātau i tēnei hākinakina.

Ko tana whakatau ki te motu, mēna e hiahia ana ētahi ki te whai i ēnei mahi tēna whakapā atu ki a ia a māna e whakako i a rātou ki te hākinakina nei.