Ngā kaupapa: Kura Tuarua, Touch Rugby

Te whakataetae a motu tuatahi mō Te Wharekura o Mauao.

  • Tāmaki Makaurau
  • Waikato/Te Waiariki

Mō te wā tuatahi ka uru Te Wharekura o Mauao ki te whakataetae Pā Whutupōro ā-motu mō ngā kura tuarua.

Heoi na te tōmuri o te karanga he wā poto noaiho te wā whakarite ki a rātou.

Ahakoa he poto te wā ki te kaiako, a Nathan Solomon, kai te mōhio ia me rerekē āna mahi kia eke ai rātou ki te taumata.

Nā Nathan Solomon, “Ko te take i whiriwhria, nā te mea, i ngā tau ki muri, ngā tau e toru e whā, i kaha akiaki au i te pā whutupōro.”

He waewae tapu ki tēnei tauwhāinga, engari ka tāea tonu e rātou te whakatutuki pai.

“Kei te hīkaka mātou ki te tākaro ki tēnei tōnamana nā te mea he pai kia mātou kia whakawhānau,” nā Te Marama Hika-Munroe (Ngāi Te Rangi).

Rima tekau mā rima ngā tīma ka tatawhai ki Tāmaki Makaurau, ka hoki mai anō ngā whakaihuwaka Taitamatāne, Taitamawāhine hoki o Kirikiriroa hei makau. Engari, kāore rātou mō te huri atu.

“He pai te kite i te nuinga o ngā tīma nā te mea kāore anō mātou kia tūtaki te nuinga o ngā tīma,” nā Iritana Te Moana (Ngāi Tūhoe).

Kāore o rātou whāinga nui, engari he hua tonu o te pōwhiri mai a ngā kaiwhakahaere ki tēnei tōnamana.

“Kia eke ki ngā taumata. Kia kite - ānei tātou i tēnei wā, ā tōna wā ko tātou kei runga,” nā Solomon.

E toru ngā rā te roanga o tēnei whakataetae, ā, hei te Rātapu oti ai.