Te Whakataetae Hahaupōro Māori

  • Waikato/Te Waiariki

He tau hōu, he whakataetae hōu, kua tau ki ngā rekereke o Tauhara Maunga. E ai ki tētahi o ngā pou o te kaupapa nei kia Wharehuia Milroy, ko te tino kaupapa ko te rauhītanga mai no te tokomaha o te ao Māori e whai ana i te tākaro hahaupōro ki roto i a Tūwharetoa.

Ko te tau 76 tēnei o te whakataetae Māori, ā ko te hui-ā-tau te timatanga pera i ngā tau kua pahure. Ko te mahere rautaki tekau tau tētahi o ngā kaupapa matua, e aro ana ki te whakapiki i te rahi o te iwi Māori e tākaro ana i tēnei hākinakina.

Ko tā tētahi o ngā mema o te Kāhui ko John Cribb, e kaha whakapono ana rātou koia rā te anga whakamua tika. Ko te whakakotahi i ngā takiwā katoa me te whainga kotahi, ko te whakawhanake i te hunga rangatahi e rata ana ki tēnei hākinakina, me te aha ka whakapiki ake te rahi o ngā toki Māori e tākaro ana.

He wawata kua roa e wawatatia ana. Nā runga i te mōhio tōna 17,000 ngā kaitākaro i Aotearoa kua huri tuara i ngā tau tata nei. Nā reira ko tētahi aronga o te rautaki ko te whakaritea wānanga whakawhanake i te hunga rangatahi. Ko te tauira o aua wānanga ka timata i Taupō hei te wāhanga tuarua o ngā hararei kura tuarua.

Ko tā ngā kaiwhakahaere, ko Phill Tataurangi tētahi o ngā toa hahaupōro Māori kua whakaputa i tōna tautoko mo tēnei kaupapa me tōna hiahia ki te whai wāhi, ki te tuari hoki i āna nei mōhiotanga mo tēnei kēmu.

Āpiti atu ki ngā tini hua o tēnei hui, ko ngā toa tāne, wāhine hoki ka whai tūranga motuhake ki te whakataetae NZ Open mo te wā tuatahi. Ko Te Rongopai Clay tētahi o ngā kaitākaro, e tino hīkaka ana ia ki te whai wāhi i tēnei tau nā te mea he angitū nui kei te wātea. Ko tāna anō he atamira te tātāwhāinga NZ Open ka taea te whakaatu atu ki te ao te mana o ngā kaitākaro Māori.

Heoi, ahakoa te tautoko a ngā kaumātua i ngā toa rangatahi, ko te tino matū o ērā momo haumāuiuitanga ko te whānau. He whakaaro e tino tautokohia ana e tētahi o ngā māreikura o te kaupapa nei, ko Iritana Tawhiwhirangi. Ko tāna ko te oranga o te ao Māori, ahakoa te oranga o te tinana, oranga mātauranga, oranga aha, mā te whānau katoa e hiki.

Ka haere tonu te whakataetae mo te roanga o tēnei wiki.

Kairīpoata: Kereama Wright.