Te wero a NZ ki a Hāmoa mō te tūranga tuatoru

I te kore eke panuku a te kapa Opango Takiwhitu, tērā ia te pātai ka pehea tā rātou tū ki te taumahekeheke Orimipia 2016 ki Rio de Janeiro.

E rere ana ngā whakatakē a ētahi autaua hākinakina me te kii ake, kua tō te wā tākaro ki ētahi tautōhito o te kapa, heoi kua rāhakitia e kaiako Gordon Tietjens aua kupu whakaiti mō āna kaitākaro.

Ohorere katoa ngā kaitaunaki o te kapa Ōpango takiwhitu, kāore a Aotearoa i eke atu ki te whiringa toa, i mieretia rātou e te kapa Keyna i te whiringa whāiti, he 19-14.

I te whiringa toa i tuki rae ki te rae a Kenya ki te whenua o Ingarangi, engari nō Ingarangi te whiwhi, he 24-19.

Hei tā etahi, whai muri i te hinganga o Aotearoa ka uaua tā rātou kapo metara koura i te huinga taumahekeheke Orimipia ka tū ki  Rio de Janeiro hei te 2016.

Tāpiri atu, ko te kōrero a ētahi autaua hākinakina, he pakeke rawa a Tomasi Cama rātou ko Lote Raikabula, ko kāpene DJ Forbes hoki, kua tae te wā me heke pea rātou mai i te kapa.

Ko tētahi kaitākaro hei whakaarotanga mā te kaiako a Gordon Tietjens, ko te ihumanea ō-mua o te kapa Opango e wawatatia nei kia mau i te poraka Takiwhitu ki te huinga Orimipia, ko Sonny Bill Williams.

A ahakoa rā ngā auheke o te wā, i eke tuatoru a Aotearoa i tō rātou whakahinga i a Hāmoa i te whiringa whaiti: 17-7.

Hei āpōpō rere atu te kapa ki Los Vegas, ka mahue mai ko DJ Forbes na te wharanga pona rāua ko Kurt Baker nā te wharanga iohere kātete ki te wā kāinga, ko  Mark Jackman raua ko  and Milford Keresoma a rāua tūranga i te kapa e whakakapi.

Kairīpoata:  Tamati Tiananga