Kaupapa: Rugby

Te tūmanako a tētahi Mamaku mā te taitara ā-ao e rongonui ai te kapa

Ko te kapa Mamaku te kapa toa whakaihuwaka whutupōro wāhine o te ao.  Koirā i mana ai i tēnei rā i te putanga mai o te tuatahi o ngā tatauranga a te uepū whutupōro o te ao.

Engari, e ai ki tētahi o ngā kaitākaro Māori o te kapa, mā tēnei pikinga taumata ā ao e tūmanakotia ana ka whakatairanga ake anō te kēmu ki konei.

Me puta tahi te ihu Mamaku me te ihu Ōpango i te rēhi kotahi.  Hei tā Hinewai Pomare, "E hiahia ana ratou kia piki engari me kaha tonu, kia rite anō ki ngā tāne."

Nō te rā nei ka puta te pūrongo a te Uepū Whutupōro o te Ao e pōhiri mai ana i tōna papa tātai tuatahi mō te whutupōro wāhine - āe mārika ko Aotearoa kei tawhiti e haere ana.

"He tīmata engari e ngaoki tonu ana, he tino hiahia kia tino hīkoi, kia tino oma kia kite ai kia nui ake te whakaputa i ngā kēmu, te whakaputa i ngā kēmu a ngā wāhine ki ngā tōpito katoa," te kii a Pomare.

Ko ā tātou wāhine kei te tūranga tuatahi, whai muri i a rātou ko Wīwī, ko Ingārangi, ko Airani, ko Kānata, ko Āmerika whānui, ā, ko Ahitereiria hei whakataupoki ake i ngā kapa wāhine o te ao.

"Ki te titiro koe ki whenua ke ki Ahitereiria, ki Amerika, ki China, Ingarangi, aua momo whenua katoa, kua kaha rātou te whāngai i ngā moni ki ngā tīma wāhine.

E whakamahia ana te pūnaha a te tākaro hunga tāne, inā rā, he āta wetewete i ngā tākaro wāhine katoa mai anō i te tau waru tekau mā whitu.  Koia i mahuta ai ko ngā papa tātai o mohoa nei.

Hei tā Pomare anō, "Engari mō Aotearoa, kāre anō mātou kia tino whāngaia aua momo moni, i aua momo resources katoa ki te whakapiki i te tīma, ki te whakakaha ake i aua mea katoa."

Me te tūmanako nui anō rā, kia Ōpango katoa te kura mahora o te kēmu wāhine ki te ao.

"Kua kite te marea i ngā Ōpango e tākaro ana i te pouaka whakaata engari itiiti noa iho ngā kēmu a ngā wāhine e whakapāho ana i te pouaka whakaata nō reira āe, he mea pai tēnei," hei tāna.

Ka tīmata te whakataetae Ono Whenua wāhine hei ēnei rangi whakatā, mā kōnā kitea ai te kounga tākaro a te wahine.