Kaupapa: Touch Rugby

Te tōnamana Pā Whutupōro Māori ā-motu 2013

Tamati Tiananga
  • Waikato/Te Waiariki

Nō te rangi nei tīmata ai te tauwhainga pā whutupōro Māori ā-motu ki te riu o Waikato, ki Hopuhopu.

Kua tekau mā whitu tau te karapu o Tauranga Moana e whakaporo ngoi ana ki te whakataetae nei, ā, he toa o Aotearoa, he tino kaiako hoki kua puta i a rātou, me te aha, kua auraki anō te karapu ki te pae i tēnei tau ki te aruaru i te wikitōria.  

Ko Shane Sweles tēnei no Ngāti Whakahemo, ko ia tētahi o ngā mema tuatahi o te karapu pā whutupōro Māori o Tauranga Moana i tākaro tuatahi i te tauwhāinga ā-motu i te tau kotahi mano iwa rau, iwa tekau mā whitu.

Kua tino tipu te karapu nei, ā, e toru ana kapa i te tauwhāinga nei, he kapa Tāne, he kapa Wāhine, he kapa pakeke hanumi hoki.

Kua tekau tau a Paula Smith ki te karapu nei, i tīmata ia ki te kapa wāhine i raro i te rua tekau mā tahi tau.

Ināianei he mema ia o te tīma hanumi pakeke ake i te toru tekau tau.  Tata tonu ka mahue a ia i te whakataetae nei nā tētahi wharanga pokohiwi.    

Ahakoa e eke ana ngā kapa e toru ki runga i te papatākaro me whakapeto-ngoi tonu ngā kaitākaro kia puta ai te katoa ki ngā whiringa toa.

Koinei pea te tau whakamutunga ka hautūhia te whakataetae nei e te rohe o Waikato-Tainui mō tētahi wā, kua puta he kōrero kua tuku tono te rohe o Te Arawa, ā, mā rātou te kaupapa nei e whakahaere ki Rotorua hei te tau e heke mai nei.