Te taiopenga pā whutupōro a Galaxy

Wikitōria Day

He taiopenga pā whutupōro kua rua tekau mā ono tau e whakahaerehia ana ki Tāmaki Makaurau. Kōia rā ko te whakataetae Galaxy ka tū ia tau.

He takunetanga kua whanake hāere, mai i tōna huatakitanga. Inanahi rā i tae tata, i tae kōkei hoki mai ngā uri nō ngā takiwā huhua ki Tāmaki Makaurau ki te whakātu atu i ō rātau pūkenga pā whutupōro.

E tūrangahākoa ana te ngākau o Peter Walters ki te kite tonu i te mātotorutanga o ngā kaitākaro, whānau anō hoki.

He hākinakina tēnei e kaingākautia ana e te tokomaha. Hei tā Walters anō, e pūrangiaho ana tana kite i ngā kaitākaro rangatahi e ara ake ana i te ao pā whutupōro.

“He tokomaha ngā kaitākaro e ara ake ana i te ao pā whutupōro, ko ngā kaitākaro Māori ērā. He rawe ki a rātou ngā pūkenga, arā, te whiu hāere i te pōro, me erā mea katoa.”

Ko ētahi o ngā pia kua noho i raro i ngā manaakitanga a Walters, ko Sean rāua ko Callum Law, ngā māhanga nō Ngāpuhi .

Nō rāua hoki te māringai nui, i tēnei tau i whai wāhi atu rāua ki te kapa pā whutupōro mā ngā kaitākaro tekau mā whitu ngā tau heke iho o Aotearoa.

I tākaro te tokorua nei mā te kapa Auckland Galaxy i ēnei rangi whakatā, hēoi, ēhara tēnei i te wā tuatahi kua tākaro ngātahi rāua.

E mārama ana te kite i te koi o ngā pūkenga e mau nei e rāua, hēoti, hei tā rāua, mei kore ake ko ngā kaiako, kua kore rāua e eke ki tētahi taumata pēnei.

Ahakoa kua tutuki i ngā māhanga ngā tumanako mō tēnei o ngā whakataetae a tau, e mōhio ana rāua he aha tā rāua e tōminatia ai, i a tātau e whakatata atu ana ki te tau hou.