Te mana rangatahi ki te Whakataetae Hahaupōro Māori

  • Waikato/Te Waiariki

He hamahama pōro, i runga i te uruhau, mōna i toa i tāna huringa tuatahi, tekau ngā kohao ki te kore. Ko tā Te Rongopai he āhuatanga tino pai tērā, nā te mea ka āhua māmā te haere mōna hei te roanga ake o te wiki.

Ahakoa 17 tau noa iho te pakeke, kua hōhonu kē ngā pakiaka o Clay ki tēnei o ngā whakataetae. I papatū mai ia i te tau 2011, 15 tau te pakeke. Ka mutu, e ahu pērā ana i tēnei tau. Heoi anō i whakaae ia he mahi tonu kei mua i a ia.

He toki me koi i mua i te paunga o te wiki, te take, hei te Mane ia wehe atu ki Poihākena, Ahitereiria, tākaro ai mā Aotearoa i ngā taumāhekeheke rangatahi o te ao. He mea whakaongaonga, whakamaimai hoki i a ia. Ko tāna kei te hīkaka ia ki te whai wāhi ki taua kaupapa whakaharahara, engari ka aro kaha tōna titiro ki te tākaro.

Tokorima katoa ngā kaitākaro no Aotearoa ka haere, me te aha tokowhā rātou i puawai mai i tēnei whakataetae Māori.

Kairīpoata: Kereama Wright.